Tags-But

har ik jagah tū hī jalva-gar hai vo but-kada ho yā tūr-e-sīnā
nigāh-e-duniyā hai kor bātin tirī tajallī kidhar nahīñ hai

dil hamārā ḳhāna-e-allāh gar mash.hūr thā
so butoñ ke ishq meñ ab ye bhī but-ḳhāna huā

zindagī niiñd meñ Duube hue mandir kī tarah
ahd-e-rafta ke har ik but ko liye suutī hai

'kaifī' na nāzukī pe tum is but kī bhūlnā
dekhe nahīñ abhī kisī nāzuk-adā ke haath

but-parastī kī bahut 'sayyāh' ab kar yaad haq
shuġhl-e-maulā meñ rahe banda vahī hai kaam kā

jald naam apnā batā de jaise banda huuñ tirā
vāsta detā huuñ maiñ ai but ḳhudā ke naam kā

ye kis kī chashm-e-fusūñ-sāz kā karishma hai
ki TuuT kar bhī salāmat haiñ dil ke but-ḳhāne

'irvin' kā kahīñ but to clive kī kahīñ strēt
maidān meñ sabze se bahār-e-chamanī hai

qatl kartā hai to kar shauq se 'tanvīr' ko tū
rañj-āmez na bāteñ but-e-ayyār tarāsh

sūraj meñ lage dhabbā fitrat ke karishme haiñ
but ham ko kaheñ kāfir allāh kī marzī hai

kaise bhūle hue haiñ gabr o musalmāñ donoñ
dair meñ but hai na ka.abe meñ ḳhudā rakkhā hai

phire but-kade se to ai ahl-e-ka.aba
phir aa kar tumhāre qadam dekhte haiñ

sanam-kada hai ki ik mahfil-e-ḳhudā-vandāñ
bahut ḳhafā huā vo but jise ḳhudā na kahā

tujhe maiñ ġhaur se dekhūñ maiñ tujh se pyaar karūñ
ai mere but tū mire but-kadoñ se bāhar aa

'vahshat' us but ne taġhāful jab kiyā apnā shi.ār
kaam ḳhāmoshī se maiñ ne bhī liyā fariyād kā

shukr parde hī meñ us but ko hayā ne rakkhā
varna īmān gayā hī thā ḳhudā ne rakkhā

but-garī-e-jamāl meñ guzrā
ahd-e-kufr ek haal meñ guzrā

but-parastī meñ na hogā koī mujh sā badnām
jheñptā huuñ jo kahīñ zikr-e-ḳhudā hotā hai

vo but bol uTThe kisī baat meñ
ḳhudā se ye māñgā munājāt meñ

us but-e-mast pe mai-ḳhāne meñ
duḳhtar-e-raz ba-ḳhudā loT ga.ī