Tags-But

husn mahsūs se hai jalva-e-mutlaq matlūb
na sahī ka.aba to dil-e-mā.il but-ḳhāna bane

husn ai husn ye hai terī karishma-sāzī
ka.aba ban jaa.e kahīñ aur kahīñ but-ḳhāna bane

īmān meñ zāhid ke bhī aa jaa.e tazalzul
dekhe jo mirā but use kāfir-nazarī se

mire zauq-e-parastish kī karishma-sāziyāñ dekho
kabhī ka.aba kabhī ka.abe ko but-ḳhāna banā Daalā

ab to jaate haiñ but-kade se 'mīr'
phir mileñge agar ḳhudā laayā

jo dekh le us kī sūrat insān agar ho kāfir to laa.e īmāñ
jamāl kyā hai but-e-hasīñ kā kamāl hai sūrat-āfrīñ kā

ye zaḳhm-e-talab ye nā-murādī
har but ke laboñ pe hai tabassum

marte marte isī but kā mujhe kalma paḌhnā
is meñ kāfir koī samjhe ki musalmāñ mujh ko

ye mai-kada hai vo masjid hai vo hai but-ḳhāna
kahīñ bhī jaao farishte hisāb rakhte haiñ

jo ba-zāhir but-shikan haiñ aur ba-bātin but-tarāsh
ḳhūbī-e-taqdīr se vo mehrbāñ dehlī meñ haiñ

but-e-kāfir se ulfat hai 'sahar' ko
vahī jaane ki but kyā hai ḳhudā kyā

ham ko āvāra o bekār samajhne vaalo
tum ne kab is but-e-kāfir ko javāñ dekhā hai

ik din jo 'farhat-ehsās' uTThā namāz paḌhne
dekhā ki masjideñ ḳhud but-ḳhāna ho rahī haiñ

shāyad ki maiñ bahut jald islām tark kar duuñ
bāteñ jo ek but se rozāna ho rahī haiñ

ibn-e-ādam ḳhosha-e-gandum pe hai mā.il-ba-jañg
ye na hai masjid kā qissa aur na but-ḳhānoñ kī baat

yaad aatī hai kis but kī mire ḳhāna-e-dil meñ
chhātī ke kivāḌ aaj koī khol rahā hai

ghar kī tanhā.ī se kyoñ itne pareshāñ ho 'ziyā'
aao ik but ke havāle se basar raat kareñ

ka.aba Dahā to ġham na kar ai shaiḳh-e-but-shikan
dil barhaman kā hai ki banāyā na jā.egā

do hī din meñ ye sanam hosh-rubā hote haiñ
kal ke tarshe hue but aaj ḳhudā hote haiñ

hādis tere but haiñ sab barahman
allāh qadīm hai hamārā