Tags-Bijli

uThā hai ek kone meñ dhuāñ sā
kahīñ shāyad koī bijlī girī hai

fasl-e-ḳhizāñ meñ gul kā to aanā muhāl hai
bijlī hī kaash aa.e mirī āshiyāñ talak

dhīmā dhīmā sā nuur jaise tah-e-sāz
baḌhtā jaatā hai chhaTke tāroñ kā gudāz

kaliyoñ ko chaTaktā dekh ke jo bijlī ko pukārā karte the
ab raakh uḌā kar log vahī gulzār kī bāteñ karte haiñ

jiyūñ jhaḌī har sū hai pichkārī kī dhaar
dauḌtī haiñ nāriyāñ bijlī ke saar

paḌī ḳhirman-e-gul pe bijlī sī āḳhir
mire ḳhush-nigah kī nigāh ik ġhazab kī

bijlī chhalāvā fitna qayāmat ġhazab balā
maiñ kyā kahūñ vo kyā dam-e-raftār ban ga.e

ab tak vahī kaḌak hai bijlī kī bādaloñ meñ
pastī sī aa ga.ī hai par dil ke hausloñ meñ

bādal garjā bijlī chamkī roī shabnam phuul hañse
murġh-e-sahar ko hijr kī shab ke afsāne dohrāne do

hameñ to jalte dil kī raushnī meñ aage baḌhnā hai
haTā do qumqume bijlī ke nā-hamvār rāhoñ se

koh-o-vādī vahī bijlī vahī be-hoshī bhī
jalva lekin vo dil-afroz sar-e-tūr nahīñ

har ghaḌī har aan bijlī kī tarah lahrā.e hai
merī kachchī koTharī meñ jhāñk kar rah jaa.e hai

bijlī kī zad meñ aa gayā fasl-e-bahār meñ
al-muḳhtasar yahī hai mere āshiyāñ kā haal

mai-ḳhāne pe meñh baras rahā hai
bijlī kaisī chamak rahī hai

bach ke nikal ga.e jo re.āyā ko bech kar
bad-qismatī se bijlī o paanī meñ phañs ga.e

maiñ ne ḳhāk-e-nasheman ko bose diye aur ye kah ke bhī dil ko samjhā liyā
āshiyāna banānā mirā kaam thā koī bijlī girā.e to maiñ kyā karūñ

terī nabzoñ meñ bhī machlī hai kabhī bijlī kī rau
soz-e-ġham se terā dil bhī kyā kabhī detā hai lau

maalī to hai kuchh rūThā rūThā aur ahl-e-chaman bigḌe bigḌe
bijlī kī nazar chhappar chhappar ma.alūm nahīñ kyā honā hai

jab ye bārish zarā bhī thamtī hai
duur bijlī chamakne lagtī hai,

bijlī har lahar se paidā ho tire kūche meñ
le mirā har nafas-e-garm havā kā bosa