Tags-Zulf

ġharaz na furqat meñ kufr se thī na kaam islām se rahā thā
ḳhayāl-e-zulf-e-butāñ hī har dam hameñ to lail-o-nahār aayā

pareshāñ rahte ho din raat 'akbar'
ye kis kī zulf kā saudā huā hai

raheñ sone meñ laTeñ zulfoñ kī yūñhī ruḳh par
na haTā.e na chhue zulf-e-pareshāñ koī

aave nazar jo laam to aave ḳhayāl-e-zulf
jab scene paḌh ke dekhūñ huuñ dandāñ masīn ko

haa.e vo zulf-e-mushk-bū tauba
ham ko bād-e-sabā ne luuT liyā

mujh ko hālāt meñ uljhā huā rahne de yūñhī
maiñ tirī zulf nahīñ huuñ jo sañvar jā.ūñgā

tīrgī baḳht kī samjho na use tum 'aḳhtar'
multafit zulf-e-girah-gīr bhī ho saktī hai

māñge hai phir kisī ko lab-e-bām par havas
zulf-e-siyāh ruḳh pe pareshāñ kiye hue

chah-e-zaqan meñ girā chāhtā thā dil merā
darāz umr ho zulf-e-rasā ne thaam liyā

ruḳh zulf meñ be-naqāb dekhā
maiñ tīra-shab āftāb dekhā

dil pe aafat aa.ī ab ik aan meñ
zulf kuchh kahtī hai us ke kaan meñ

nik.hat-e-zulf le uḌī misl-e-ḳhayāl chal paḌī
chaltā hai kaun dekhiye aaj hinā ke saath saath

shānoñ pe ab to kākul-e-shab-rañg khol de
bikhrī huī hai zulf-e-tamannā tire liye

sar ko baazū pe mire aap jo rakh kar sote
zulf kā palkoñ hī se shāna banāyā hotā

asīr-e-zulf hamīñ ik nahīñ haiñ 'mīr' bhī the
magar ab uTh ke do-ālam ko zer-e-dām karo

tumhārī zulf kā har taar mohan
huā mere gale kā haar mohan

qadr kuchh bhī mire dil kī but-e-kāfir ne na kī
zulf-e-pechāñ se jo uljhā to mire sar maarā

rañg achho zulf achho o zebā-ḳhāl
o jo chhab hai so kuchh ajab hai re

koī tīra-baḳht mujh sā bhī hogā jahān meñ
tujh zulf se milā na mujhe taar dekhnā

'hasrat' na agar us kā qad o zulf banāte
duniyā meñ kahīñ fitna-o-āshob na hotā