gar ishq se vāqif mare mahbūb na hotā
hotā na maiñ mahjūr vo mahjūb na hotā
āfat-talab apne jo dil o diida na hote
tālib maiñ tirā tū mirā matlūb na hotā
merī sī tarah ishq se hotā kabhī betāb
e.ajāz-numā sabr kā ayyūb na hotā
naame kā mire ye thā javāb ai mah-e-nau-ḳhat
ye qā.eda-e-qāsid-o-maktūb na hotā
tarġhīb-e-vafā karnā tujhe mujh pe ravā thā
gar sheva jafā kā tirā marġhūb na hotā
'hasrat' na agar us kā qad o zulf banāte
duniyā meñ kahīñ fitna-o-āshob na hotā