Tags-Wahshat

ab na vo josh-e-tamannā baaqī
ab na vo ishq kī vahshat hai mujhe

agar tum ko mujh se mohabbat na hotī
ye saudā na hotā ye vahshat na hotī

falak ko dekh ke kahtā huuñ josh-e-vahshat meñ
ilāhī Thahre mirī aah kā dhuāñ kyūñkar

havā-e-dasht-e-vahshat ham ko le uḌtī hai bastī se
hamārā unsur-e-ḳhākī magar reg-e-bayābāñ hai

itnī vahshat ki havas vajd meñ aane se rahī
ik sadā jānib-e-aflāk se aa.ī huī hai

ye kis vahshat-zada lamhe meñ dāḳhil ho ga.e haiñ
ham apne aap ke madd-e-muqābil ho ga.e haiñ

paayā sar-e-har-zarra jigar-gosha-e-vahshat
haiñ daaġh se ma.amūr shaqā.iq kī kulāheñ

kisī se dil na is vahshat-sarā meñ maiñ ne aTkāyā
na uljhā ḳhaar se dāman kabhī mere bayābāñ kā

jo iztirāb kā mausam guzār aa.eñ haiñ
vo jānte haiñ ki vahshat kā kyā zamāna thā

phir chalā mausam-e-vahshat meñ sar-e-maqtal-e-ishq
qur.a-e-fāl mire naam dobāra niklā

dikhā ke ham ko jamāl-e-ra.anā kiyā hai kyuuñ rah-navard-e-vahshat
bane the ḳhud rahnumā hamāre ye rahbarī meñ bhī rahzanī hai

thoḌī sī jagah mujh ko bhī mil jaa.e kahīñ par
vahshat tire kūche meñ mire shahar se kam hai

garebāñ-chāk huuñ gaahe uḌātā ḳhaak huuñ gaahe
liye phirtī mujhe vahshat kabhī yuuñ hai kabhī vuuñ hai

le ga.ī bāñdh ke vahshat use sahrā kī taraf
ek dil hī to thā ab vo bhī kahāñ hai merā

raste se mirī jañg bhī jaarī hai abhī tak
aur paañv tale zaḳhm kī vahshat bhī vahī hai

huā hai ham ko ik mutrib pisar kī zulf kā saudā
hamārā shor-e-vahshat bhī ye ik paTTā hai shorī kā

faiz vahshat kā adā-e-shukr jab vājib huā
sar jhukāyā ham ne mehrāb-e-garebāñ kī taraf

khīñch kar yuuñ le chalī vahshat bayābāñ kī taraf
laa.eñ jaise tifl-e-bad-ḳhū ko dabistāñ kī taraf

hosh meñ aate haiñ dīvāne ga.ī fasl-e-bahār
dasht-e-vahshat chhup rahe pusht-e-garebāñ kī taraf

tujh ko tā-hijr rahā thā mirī vahshat se gurez
isī vahshat ne tirī yaad ko khone na diyā