Tags-Wahshat

le chalī gar vahshat-e-dil jānib-e-sahrā 'vaqār'
ranj-o-hirmāñ paañv dar par yaar ke phailā.egā

azāb-e-vahshat-e-jāñ kā sila na māñge koī
na.e safar ke liye rāsta na māñge koī

tanhā.ī se sahrā se na dariyā ke bhañvar se
vahshat mujhe hotī hai mire apne hī ghar se

ajab vahshat thī tere aa.ine meñ
jahāñ har aks hī TuuTā huā thā

ye kaisī vahshat-asar ḳhabar hai patā to ai bāġhbāñ lagānā
khaḌe hue kaan kyuuñ guloñ ke kalī ne kyā kah diyā chaTak kar

maiñ vahshat-e-junūñ huuñ mirī musht-e-ḳhāk ko
phirtī haiñ dar-ba-dar ye havā.eñ liye hue

le aa.ī hai hameñ vahshat kahāñ nahīñ ma.alūm
savād-e-dasht hai yā gulistāñ nahīñ ma.alūm

dasht o dar ḳhair manā.eñ ki abhī vahshat meñ
ishq ne pahlā qadam nām-e-ḳhudā rakkhā hai

vahshat meñ noch khā.ūñ na 'zīshān' ḳhud ko maiñ
chal duur mujh ko le ke tū merī hudūd se

zabt karnā na kabhī zabt meñ vahshat karnā
itnā āsāñ bhī nahīñ tujh se mohabbat karnā

chalo na dekheñ to kahte haiñ dasht-e-vahshat meñ
junūñ kī fauj baḌe karr-o-farr se utrī hai

shorish-e-ishq kā āsān na thā andāza
chaak ho kar mirī vahshat ko garebāñ samjhā

āshuftagī-e-vahshat kī qasam hairat kī qasam hasrat kī qasam
ab aap kaheñ kuchh yā na kaheñ ham rāz-e-tabassum pā bhī ga.e

vahshat-e-dil ne kiyā hai vo bayābāñ paidā
saikḌoñ kos nahīñ sūrat-e-insāñ paidā

apnī vahshat se hai shikva dūsre se kyā gila
ham se jab baiThā na jaa.e kū-e-jānāñ kyā kare

ye gard-bād salāmat guzarnā chāhtā hai
mire charāġh pe vahshat tamām kartā huā

ishq tanhā hai mire ālam-e-vahshat kā gavāh
tāq-o-mehrāb mire saath safar karte haiñ

itnī vahshat taarī huī ki bhuul ga.e
ye to apnī imdādī āvāzeñ haiñ

maiñ kal tanhā thā ḳhilqat so rahī thī
mujhe ḳhud se bhī vahshat ho rahī thī

achānak kahīñ ik darinde kā bain
vahshat-ālūd bad-maza bū amaltās kī