Tags-Wahshat

vo jo ik shart thī vahshat kī uThā dī ga.ī kyā
merī bastī kisī sahrā meñ basā dī ga.ī kyā

afsos ke jañgal meñ bhaTakte haiñ ḳhayālāt
ram bhuul ga.e ḳhauf se vahshat nahīñ karte

mirī vahshat meñ shāyad aa chale andāz-e-ra.anā.ī
ki zulfoñ kī tarah dil kī pareshānī nahīñ jaatī

pasti-e-fikr-o-nazar vahshat-e-asrār-o-rumūz
ho rahā hai ba-ḳhudā jahl fuzūñ dānish meñ

ghar hai vahshat-ḳhez aur bastī ujaaḌ
ho ga.ī ek ik ghaḌī tujh bin pahāḌ

garebān vahshat ne phāḌā to kyā ġham
ḳhudā rakhne vaalā hai parda hamārā

tujh se bhī kab huī tadbīr mirī vahshat kī
tū bhī muTThī meñ kahāñ bheñch sakā paanī ko

dil ke zaḳhmoñ meñ tujhe de ke jagah ham dil ko
vahshat-o-chain kā sañgam nahīñ karne vaale

apne vahshat-zada kamre kī ik almārī meñ
terī tasvīr aqīdat se sajā rakkhī hai

vahshat vahshat tirī tafrīh kā sāmāñ hai abhī
ki garebāñ kā mire naam garebāñ hai abhī

ā.īna-e-vahshat ko jilā jis se milī hai
vo gard rah-e-tark-e-marāsim se uThī hai

muġhāñ se is ko ulfat hai ayaañ chehre se vahshat hai
koī ḳhādim se kyā pūchhe ajam yuuñ bhī hai aur yuuñ bhī

mirā ilhād to ḳhair ek la.anat thā so hai ab tak
magar is ālam-e-vahshat meñ īmānoñ pe kyā guzrī

galiyāñ jhākīñ saḌkeñ chhānīñ dil kī vahshat kam na huī
aañkh se kitnā laavā ublā tan kī hiddat kam na huī

ḳhvāb sahrā tirī ta.abīr nikal aa.ī hai
koī vahshat hai ki jāgīr nikal aa.ī hai

be-amāñ saa.e kā bhī rakh bād-e-vahshat kuchh ḳhayāl
dekh kar chal darmiyān-e-bām-o-dar maiñ bhī to huuñ

zarf vīrāna ba-qadr-e-himmat-e-vehshat nahīñ
laao har zarre meñ paidā vus.at-e-sahrā kareñ

hijr meñ jī ke bahalne ke the jitne hiile
vahshat ik saath rahī ho ga.e sab mil ke ḳhilāf

hamāre dil meñ jo vahshat ne aag bhaḌkā.ī
sharar bhī rah ga.e pīchhe ye garm jast hue

dasht-e-vahshat meñ ba-juz-reg-e-ravāñ koī nahīñ
aaj kal shahr meñ hai lāla-e-sahrā.ī bhī