Tags-Visaal

shab-e-visāl kī ḳhushbū fazā kī rañgīnī
kahīñ se lā mire saaqī ki raat jaatī hai

ātishīñ ḳhū se ārzū-e-visāl
pak gayā ab ḳhayāl-e-ḳhām mirā

phir vahī dhuñdle nuqush-e-māh-o-sāl
phir vahī sub.h-e-bahārāñ phir vahī shām-e-visāl

ham aaj bahut hī pareshāñ haiñ is vaqt ke pher se hairāñ haiñ
hameñ le ke chalo kisī aisī taraf jahāñ hijr o visāl nahīñ hotā

jise ham samajhte haiñ marg hai vo to ik taġhayyur-e-hāl hai
jiye jis ke hijr meñ umr-bhar vo hī ek lamha visāl hai

shauq-e-visāl-e-yār meñ ik umr kaaT dī
ab baam o dar saje haiñ to ghabrā rahā huuñ maiñ

tamām hijr usī kā visāl hai us kā
maiñ jī rahā huuñ magar jaan o maal hai us kā

āsāñ nahīñ visāl to dushvār bhī nahīñ
mushkil meñ huuñ ye mushkil-e-āsāñ liye hue

ranj-e-firāq bhī hai nashāt-e-visāl bhī
huuñ saath saath dard ke darmāñ liye hue

ḳhushā vo raunaq-e-hañgāma-e-visāl ab to
yaqīn hī nahīñ aatā ki yuuñ huā hogā

ghabrā ke us kā kahnā vo haa.e shab-e-visāl
bas bas zarā ab aap to haT kar ke soiye

jismoñ se māvarā bhī haqā.eq bahut se haiñ
paa.ī hai dil ne raushnī shām-e-visāl meñ

kabhī mauj-e-ḳhvāb meñ kho gayā kabhī thak ke ret pe so gayā
yūñhī umr saarī guzār dī faqat ārzū-e-visāl meñ

Tuk na Thahrā mire vo paas aa kar
kuchh tamāshā thā ye visāl na thā

nāla-e-dil kamāl kā niklā
un se pahlū visāl kā niklā

na rahī be-ḳhudi-e-shauq meñ itnī bhī ḳhabar
hijr achchhā hai ki 'mahrūm' visāl achchhā hai

kab payām-e-visāl aatā hai
ḳhvāb hai jo ḳhayāl aatā hai

yaar ke bas meñ hai ummīd-e-visāl
yaar par iḳhtiyār hai kis kā

ye furqatoñ meñ lamha-e-visāl kaise aa gayā
mohabbatoñ meñ phir nayā ubaal kaise aa gayā

ḳhudā kare na kabhī mil sake davām-e-visāl
jiyeñge ḳhaak agar tere ḳhvāb hī se ga.e