huā kare agar us ko koī gila hogā
zabāñ khulī hai to phir kuchh to faisla hogā
kabhī kabhī to ye dil meñ savāl uThtā hai
ki is judā.ī meñ kyā us ne pā liyā hogā
vo garm garm nafas kaise Thahrte hoñge
ab in shaboñ ko vo kaise guzārtā hogā
kabhī jo guzrūñ tire shahar se to sochtā huuñ
ki is zamīn pe kyā kyā qadam paḌā hogā
ḳhushā vo raunaq-e-hañgāma-e-visāl ab to
yaqīn hī nahīñ aatā ki yuuñ huā hogā
vo khoī khoī vafāoñ kā bhūlā-bisrā giit
kabhī to us ke shabistāñ meñ bhī gayā hogā
nikal paḌe the yūñhī ham to ek din ghar se
kise ḳhabar thī ki yuuñ tum se sāmnā hogā
tirī barāt meñ din bhar yahī ḳhayāl rahā
ki is ḳhushī kā asar tere dil pe kyā hogā
kabhī uThe hī nahīñ ham talāsh ko varna
koī to shahr meñ apnā bhī āshnā hogā
ye haul-nāk ḳhamoshī judā.ī kā āshob
maiñ sochtā huuñ ki yūñhī rahā to kyā hogā
phir aaj shaam se hī zehan ko farāġhat hai
phir aaj shab vahī yādoñ kā silsila hogā
kis aarzū meñ uThe kis tarah chale 'anjum'
is aadhī raat meñ ab kis kā dar khulā hogā