Tags-Ayaadat

jab ā.eñge vo pa.e-ayādat to hogī dil ko umīd-e-sehhat
zamāna mujh ko duā karegā masīh merī davā kareñge

maiñ jo bīmār huā us ne ayādat kī hai
ḳhū-e-rahmat bhī usī qātil-e-saffāk meñ hai

un marīzoñ kī ayādat ko vo ab nikle haiñ
maut jā kar jinheñ miTTī meñ milā bhī aa.ī

bīmār dil ke hamdam ik dard-o-ġham the so bhī
bahr-ayādat aate haiñ gaah gaah donoñ

kahāñ kī chāra-farmā.ī ayādat tak nahīñ karte
masīhā.ī pe marte haiñ aur itnā ho nahīñ saktā

vo ayādat ko to aayā thā magar jaate hue
apnī tasvīreñ bhī kamre se uThā kar le gayā

ab ajal kyuuñ ki aa.egī dekhūñ
vo ayādat ko aa.e baiThe haiñ

ta.aziyat kījiye ab vaqt-e-ayādat to gayā
aap aa.e magar aane meñ baḌā vaqt lagā

na ghaTtī shān-e-māshūqī jo aa jaate ayādat ko
bure vaqtoñ meñ achchhe log aksar kaam aate haiñ

ab ke ye soch ke bīmār paḌe haiñ ki hameñ
Thiik honā hī nahīñ terī ayādat ke baġhair

na jāñ-ba-lab kyuuñ marīz-e-ġham ho pa.e-ayādat na aa.e dekho
masīh kahte haiñ log jin ko vo jaan kar maar Dālte haiñ

kah ke ye Tal ga.e bālīñ se ayādat ko jo aa.e
ab tirā hāl-e-pareshāñ nahīñ dekhā jaatā

sun rahā huuñ vo ayādat ke liye aate haiñ
aaj hai pursish-e-āmāl kī haibat dil meñ

ab ayādat ko mirī koī nahīñ aa.egā
phir huuñ bīmār kisī ko na yaqīñ aa.egā

aane lage haiñ vo bhī ayādat ke vāste
ai chārāgar marīz ko achchhā kiyā na jaa.e

shukriya aap ke aane kā ayādat ko mirī
dard kam ho gayā ārām se pahle pahle

ayādat ke bahāne mere ghar vo roz aate haiñ
mohabbat vāloñ bīmārī bhī koī chiiz hotī hai

ab to hāl-e-dil-e-bīmār ḳhudā hī jaane
hālat-e-zār ayādat nahīñ karne detī

ayādat ko aa.e shifā ho ga.ī
mirī ruuh tan se judā ho ga.ī

ye kah do bas maut se ho ruḳhsat kyuuñ nāhaq aa.ī hai us kī shāmat
ki dar talak vo masīh-ḳhaslat mirī ayādat ko aa chuke haiñ