vaqt kā jhoñkā jo sab patte uḌā kar le gayā
kyuuñ na mujh ko bhī tire dar se uThā kar le gayā
raat apne chāhne vāloñ pe thā vo mehrbāñ
maiñ na jaatā thā magar vo mujh ko aa kar le gayā
ek sail-e-be-amāñ jo āsiyoñ ko thā sazā
nek logoñ ke gharoñ ko bhī bahā kar le gayā
maiñ ne darvāza na rakkhā thā ki Dartā thā magar
ghar kā sarmāya vo dīvāreñ girā kar le gayā
vo ayādat ko to aayā thā magar jaate hue
apnī tasvīreñ bhī kamre se uThā kar le gayā
maiñ jise barsoñ kī chāhat se na hāsil kar sakā
ek ham-sāya use kal varġhalā kar le gayā
saj rahī thī jins jo bāzār meñ ik umr se
kal use ik shaḳhs pardoñ meñ chhupā kar le gayā
maiñ khaḌā fōtpath par kartā rahā rickshaw talāsh
merā dushman us ko motor meñ biThā kar le gayā
so rahā huuñ meñ liye ḳhālī lifāfa haath meñ
us meñ jo mazmūñ thā vo qāsid churā kar le gayā
raqs ke vaqfe meñ jab karne ko thā maiñ arz-e-shauq
koī us ko mere pahlū se uThā kar le gayā
ai azāb-e-dostī mujh ko batā mere sivā
kaun thā jo tujh ko siine se lagā kar le gayā
mehrbāñ kaise kahūñ maiñ 'arsh' us bedard ko
nuur āñkhoñ kā jo ik jalva dikhā kar le gayā