Tags-Saqi

gar chaleñ rāh-e-talab meñ toḌ Dālūñ apne paañv
bas kabhī saaqī ke aage haath phailātā huuñ maiñ

abr ko dekhā jo saaqī ne nigāh-e-mast se
ra.ad bolā ab mai-e-gul-rañg barsātā huuñ maiñ

bajā.e zahrāb kis ne saaqī bhare haiñ amrit se jām-o-sāġhar
ki log āb-e-hayāt pī kar qazā se pahle hī mar rahe haiñ

saaqī tirī navāzish-e-paiham ke bāvajūd
mahsūs ye huā ki abhī tishnagī rahī

us anjuman meñ ki chashm-e-sāqī kafīl ho aish-e-zindagī kī
vo bāda-ḳhvārī meñ ḳhaam hoñge jo fikr-e-jām-o-subū kareñge

āb-e-ravāñ o sabza o rū-e-nigār hai
saaqī shitāb aise meñ le kar sharāb aa

na jānūñ tū saaqī thā kis bazm kā
nayan terī mujh kuuñ ḳhumārī lage

aur saaqī pilā abhī kyā hai
terī sarkār meñ kamī kyā hai

saaqī kā ehsāñ nahīñ ham par
ḳhuun diyā hai jaam liyā hai

shāyad 'aḳhgar' hī kī tauba kī ḳhabar hai yaaro
aaj saaqī ke ishāroñ ko hañsī aatī hai

rakhte haiñ kahīñ paañv to paḌte haiñ kahīñ aur
saaqī tū zarā haath to le thaam hamārā

in ko behis jaan na saaqī avval-e-shab hai bāda-nosh
raat Dhale mahsūs kareñge shīshe kī jhankār bahut

koī sarshār ho jaa.e koī ik buuñd ko tarse
inhīñ bātoñ se saaqī mai-kada badnām hotā hai

sharāb-e-asr-e-nau meñ be-ḳhudī hai nai ḳhudī saaqī
jo tū ne aaj se pahle pilā.ī thī vahī mai lā

abhī javānī hai mai-kade par abhī to bādal bhī hai ghanerā
abhī to zinda hai husn saaqī abhī salāmat hai ishq merā

saaqī bhī yuuñ jaam le kar rah gayā
jis tarah tasvīr ho sāġhar-ba-kaf

tum ho saaqī to ajab kyā hai ki maiḳhāne meñ
evaz-e-san.at-e-jam sāġhar-e-sarshār bike

kah rahī hai mujh se 'mohan' chashm-e-sāqī baar baar
mai-kashī kā lutf pī kar hī sambhal jaane meñ hai

saaqī tire baġhair hai mahfil se dil uchāT
so jaise jī udaas hai so dil se dil uchāT