Tags-Saqi

saaqī kī ġhulāmī kar legā aur vo bhī kuchh qatroñ ke liye
nādān sahī mullā lekin itnā bhī vo nādāñ kyā hogā

jo tishna-laboñ ke haq ke liye saaqī se laḌe vo riñd kahāñ
jo dast-o-dahāñ kā ḳhūgar hai vo dast-o-garebāñ kyā hogā

saaqī ke dayār-e-rahmat meñ hindū-o-musalmāñ kyā hogā
is bazm-e-pāk-nihādāñ meñ ālūda-e-īmāñ kyā hogā

rindadan-e-balā-nosh kā aalam hai nirālā
saaqī kī ināyat pe bhī nam-dīda rahe haiñ

azaañ ho rahī hai pilā jald saaqī
ibādat kareñ aaj maḳhmūr ho kar

mai-kade meñ kyā takalluf mai-kashī meñ kyā hijāb
bazm-e-sāqī meñ adab ādāb mat dekhā karo

saaqī ke talattuf ne aalam ko chhakāyā hai
labrez hamārā hī ik jaam nahīñ hotā

zarā piine to de saaqī sharāb-e-ma.arifat mujh ko
udhar phir jā.egā qibla bhī ruḳh hogā jidhar merā

nahīñ hai ehtiyāj-e-ġhair vaqt-e-josh-e-betābī
chhalak jaatā huuñ be-taklīf saaqī maiñ subū ho kar

ye samāñ use dikhā.ūñ sabā jā use bulā lā
na bahār hai na saaqī na sharāb hai na pyālā

is ḳharābe meñ to ham donoñ haiñ yaksāñ saaqī
ham ko piine tujhe dene kā na andāz aayā

saaqī ke aane kī ye tamannā hai bazm meñ
dast-e-subū buland hai dast-e-duā ke saath

qadam kyā Dagmagā.eñge rah-e-ulfat meñ ai saaqī
bahut hī muḳhtasar sī be-ḳhudī hai aur bas maiñ huuñ

ujaḌ jā.egā jis din kārḳhāna bāda-ḳhvāroñ kā
bahut ro.egā saaqī kashtī-e-mai kī tabāhī ko

hijr-e-sāqī meñ nazar aayā kahīñ gar shaġhl-e-mai
DabDabā.e dīda-e-tar chashm-e-sāġhar kī tarah

tauba tauba kyā ġhazab saaqī kī ġhaflat ne kiyā
sab kī sūrat dekhtā huuñ riñd-e-be-zar kī tarah

saaqī tirī āñkhoñ ko salāmat rakkhe allāh
ab tak to maiñ sharminda-e-paimāna nahīñ huuñ

sab kuchh mire saaqī ne diyā hai mujhe 'manzar'
mohtāj-e-mai-o-shīsha-o-paimāna nahīñ huuñ

haañ fasl-e-gul meñ rindoñ ko saaqī
apnā lahū bhī piinā paḌā hai

zabān-e-hosh se ye kufr sarzad ho nahīñ saktā
maiñ kaise bin piye le luuñ ḳhudā kā naam ai saaqī