aanā hai yuuñ muhāl to ik shab ba-ḳhvāb aa
mujh tak ḳhudā ke vāste zālim shitāb aa
detā huuñ naama maiñ tujhe is shart par abhī
qāsid tū us ke paas se le kar javāb aa
aisā hī azm hai tujhe gar kū-e-yār kā
chaltā huuñ maiñ bhī ai dil-e-pur-iztirāb aa
ye ḳhasta chashm vā hai tire intizār meñ
ai sub.h muñh dikhā kahīñ ai āftāb aa
tā ye shab-e-firāq kī dījūr duur ho
ai rashk-e-māh ghar meñ mire be-naqāb aa
āb-e-ravāñ o sabza o rū-e-nigār hai
saaqī shitāb aise meñ le kar sharāb aa
ro.eñ gale se lag ke baham ḳhuub koī dam
kyā dekhtā hai ai dil-e-be-sabr-o-tāb aa
bahr-e-jahāñ meñ der-shud aamad ravā nahīñ
mānind-e-qatra jā tū ba-rañg-e-hubāb aa
qurbānī aaj dar pe tire karnī hai mujhe
le kar ke teġh to bhī barā.e-savāb aa
shāyad vo tujh ko dekh ke ġham khaa.e 'mus.hafī'
tū us ke sāmne to ba-chashm-e-pur-āb aa