Tags-Relationship

kaise afsūñ the vahāñ kaise fasāne the udhar
zindagī tujh se ta.alluq ke bahāne the udhar

ab to bas ek tasalsul hai ta.alluq kā darāz
imtihāñ ho bhī chukā va.ade vafā ho bhī chuke

ta.alluq rakh ke bhī hai be-ta.alluq
samajh meñ baat ye aatī nahīñ hai

ajab mausam thā jab qurbat tirī sarmāya-e-jāñ thī
vahī mausam hai aur tark-e-ta.alluq kar rahā huuñ maiñ

jab bhī mire aañsū bahte haiñ aur terā dāman jaltā hai
dekh ke apnā husn-e-ta.alluq har ahl-e-gulshan jaltā hai

guzishta mausamoñ kī narm ḳhushbū
ta.alluq kā pata detī hai ab bhī

kabhī to ham haiñ yahāñ vahāñ ke kabhī tasavvur idhar udhar kā
sukūn-o-rāhat se kyā ta.alluq ki bad-gumānī hai aur ham haiñ

ta.alluq hai na ab tark-e-ta.alluq
ḳhudā jaane ye kaisī dushmanī hai

kūcha kūcha phaileñ bāteñ qat.a-e-ta.alluq-ḳhātir kī
auroñ kā to zikr hī kyā dīvār-o-dar ko hairat thī

ta.alluq TuuT jaa.e to safīne Duub jaate haiñ
ye sab kahne kī bāteñ haiñ haqīqat kuchh nahīñ hotī

vo ta.alluq tirī ik zaat se jo thā mujh ko
us ta.alluq ko bahar-e-hāl nibhā kar dekhā

kyuuñ na duniyā ko dikhā.ūñ maiñ jale haath kā zaḳhm
kuchh charāġhoñ se ta.alluq thā udhar se pahle

ta.alluq zindagī se muḳhtasar rakkhā huā hai
ki shānoñ par nahīñ neze pe sar rakhā huā hai

is ilāqe se mirā koī ta.alluq bhī nahīñ
ye ilāqa ki mirā desh huā chāhtā hai

vo bhūle aur ham bhūle na un ko
ta.alluq hai yahī un kā hamārā

bahut purānā ta.alluq ye un parindoñ se
magar maiñ samjhī nahīñ un kī dostī ab tak

na rahā terī mohabbat se ta.alluq na sahī
nisbat-e-ġham se bhī kyā ḳhud ko pukārā na kareñ

vo ta.alluq hai tire ġham se ki allāh allāh
ham ko hāsil ho ḳhushī bhī to gavārā na kareñ

un ko ye fikr hai ab tark-e-ta.alluq kar ke
ki ham ab pursish-e-ahvāl kareñ yā na kareñ

be-ta.alluq-pan bhī āḳhir qaid hai
qaid paa.ī ḳhātir-e-āzād meñ