hādisa ishq meñ darpesh huā chāhtā hai
dil shahanshāh se darvesh huā chāhtā hai
ishq ko zid hai ki ta.amīr kare shahr-e-umīd
husn kam-baḳht bad-andesh huā chāhtā hai
is ilāqe se mirā koī ta.alluq bhī nahīñ
ye ilāqa ki mirā desh huā chāhtā hai
mere ash.ār meñ ġhazloñ maiñ mire gītoñ meñ
ek kā zikr kam-o-besh huā chāhtā hai
jaah kī chaah nahīñ ḳhvāhish-e-mansab bhī nahīñ
mere andar koī darvesh huā chāhtā hai
mālik-e-saut-o-sadā shā.er-e-gumnām razā
terī dahlīz pe ab pesh huā chāhtā hai