Tags-Relationship

na ḳhākiyoñ se ta.alluq na qudsiyoñ se rabt
na ham zamīñ ke liye haiñ na āsmāñ ke liye

aur phir dil ne us ko chhoḌ diyā
jab ta.alluq bahāl thā hī nahīñ

aise lagtā hai mirī jaan ta.alluq apnā
is mulāqāt se aage nahīñ jaane vaalā

vo ta.alluq ham ko qaid-e-ḳhvāb jaisā thā 'zahīr'
khul ga.iiñ āñkheñ to āsānī se bāhar aa ga.e

hamīñ ne tark-e-ta.alluq meñ pahl kī ki 'farāz'
vo chāhtā thā magar hausla na thā us kā

kiyā hai ibrat-misāl kaisā ḳhayāl-e-ibrat-nazar ne ham ko
kareñ ta.alluq kisī se kyā ham jo shakl dekhī guzishtanī hai

kyā thī ḳhabar ki tark-e-ta.alluq ke baad bhī
ham ko vo shoḳh parda-nashīñ yaad aa.egā

tum se jab tark-e-ta.alluq kar liyā
dil to dil mujh se ḳhafā hai aa.ina

tumhārī yādoñ ke chaḌhte dariyā ko ḳhushk-sālī se kyā ta.alluq
tumhārī yādoñ kā chaḌhtā dariyā har ek mausam meñ bah rahā hai

ta.alluq hī nahīñ hai jin se merā
maiñ un ḳhadshāt meñ rakkhā huā huuñ

lā-ta.alluq nazar aatā thā ba-zāhir lekin
shahr ko us ne mirī ḳhair-ḳhabar par rakkhā

kuchh ta.alluq hī nahīñ jis kā mire hālāt se
mere mohsin terā ik ehsān mujh par aur hai

hamāre dil kā ta.alluq nahīñ zamāne se
sau apnī ḳhvāhish-e-duniyā uThā yahāñ se nikal

ḳhudā aalam hai mazmūn-e-ḳhayālī haiñ tasavvur meñ
na mujh ko kuchh ta.alluq hai na merī us ko parvā hai

tujh meñ aur mujh meñ ta.alluq hai vahī
hai jo rishta saaz aur mizrāb meñ

kyā baat hai ki tark-e-ta.alluq ke bāvajūd
ham ne tumhārā naam liyā hai kabhī kabhī

na.e sire se ta.alluq baneñge bigḌeñge
ki ab irāde haiñ ek ek baat karne ke

umr bhar kaun nibhātā hai ta.alluq itnā
ai mirī jaan ke dushman tujhe allāh rakkhe

ta.alluq jo bhī rakkho soch lenā
ki ham rishta nibhānā jānte haiñ

tark-e-ta.alluq kar ke zabāñ se dil kā jiinā mushkil hai
ye kaisā āhañg-e-vafā hai tum bhī chup ho ham bhī chup