Tags-Relationship

vo ta.alluq zindagī jis meñ rahā bil-vāsta maiñ
us samet ik din sipurd-e-tāq-e-nisyāñ ho gayā maiñ

baat saarī asl meñ ye thī maiñ us se bad-gumāñ
ik ta.alluq meñ kahīñ pe shak ke aane se huā

rābta bhī nahīñ rakhtā hai sar-e-vasl koī
aur ta.alluq bhī mo.attal nahīñ hone detā

zarā sī laġhzish pe toḌ dete haiñ sab ta.alluq zamāne vaale
so aise vaisoñ se bhī ta.alluq banā ke rakhnā kamāl ye hai

thā bahut saffāk tansīḳh-e-ta.alluq kā fareb
us kā aalam hai jise apnā jahāñ samjhā thā maiñ

mirā tumhārā ta.alluq bigaḌ ke ban gayā hai
mire tumhāre ḳhayālāt kā amiiñ koī hai

na socho tark-e-ta.alluq ke moḌ par ruk kar
qadam baḌhāo ki ye hādsa zarūrī hai

'vasīm' kaisī ta.alluq kī raah thī jis meñ
vahī mile jo bahut dil dukhāne vaale the

jism kā jism se kuchh din kā ta.alluq hogā
ruuh kā ruuh se āġhāz kā yārāna hai

ta.alluq tum se jo bhī hai nahīñ ma.alūm kal kyā ho
chalo ye faisla apnā ḳhudā par chhoḌ dete haiñ

ye fāsloñ kī haqīqat ye qurbatoñ kā tilism
azaab haiñ ye ta.alluq ke ḳhvāb āñkhoñ ko

ek bāġh-e-ta.alluq kisī chashm-e-hairāñ meñ ābād hai
ai ḳhudā is nazāre ko sarsabz rakhnā sadā ke liye

kyā aur na thā tark-e-ta.alluq kā bahāna
sunte haiñ ki ab tum hameñ rusvā na karoge

shahr ko chhoḌ do aur gaañv ko jaao tum bhī
is ta.alluq ke takalluf ko uThāo tum bhī

log milne ko chale aate haiñ dīvāne se
shahr kā ek ta.alluq to hai vīrāne se

ik zamāne ko rakhā tere ta.alluq se aziiz
silsila dil kā bahut duur talak jaatā hai

ta.alluq toḌ kar us kī galī se
kabhī maiñ juḌ na paaya zindagī se

ham the mohtāt ta.alluq meñ tavāzun rakkhā
pās-e-ulfat rahā had-darja aqīdat nahīñ dī

muddat huī hai qat-e-ta.alluq kiye 'nadīm'
us jān-e-intizār kā phir intizār hai

huā na qurb-e-ta.alluq kā iḳhtisās yahāñ
ye rū-shanās zi-rā-e-ba.īda aayā thā