Tags-Poverty

kyā rahūñ ġhurbat meñ ḳhush jab ho havādis kā ye haal
naama laatā hai vatan se nāma-bar aksar khulā

vatan se nikal kar akele chale the magar ḳhush-yaqīnī ke qurbān jaa.eñ
milā dasht-e-ġhurbat meñ ik ik qadam par hameñ ik na ik jān-pahchān vaalā

tumhāre shahr meñ aa.e haiñ ahl-e-ġhurbat phir
is aas par ki koī dard-āshnā hogā

dil-kushāda bhī haiñ unhī ke jo
sar pe ġhurbat kā taaj rakhte haiñ

bhej kar ham jahez par la.anat
ahl-e-ġhurbat kī laaj rakhte haiñ

bātoñ se kaTe kis kī bhalā raah hamārī
ġhurbat ke sivā koī nahīñ ham-safar apnā

merī ġhurbat milegī virse meñ
is ko mere ayaal khīñcheñge

zaḳhm ġhurbat ke sab raqam kar ke
karb-e-qaht-ur-rijāl khīñcheñge

dasht-e-ġhurbat ke shab-o-roz kī lazzat na milī
sar vatan meñ bhī bahut dar-ba-darī ne maarā

daulat sabr-o-sukūñ gauhar-e-ashk-e-rañgīñ
ham ne ġhurbat meñ luTā.e ḳhazāne kyā kyā

badan se ruuh ruḳhsat ho rahī hai
mukammal qaid ġhurbat ho rahī hai

dushmanoñ ko to yahī baat bahut khaltī hai
ham to ġhurbat meñ bhī zinda haiñ amīroñ kī tarah

is qadar mahv-e-tasavvur huuñ sitamgar terā
mujh ko ġhurbat meñ nazar aane lagā ghar terā

sūkhā huā chehra ġhurbat se utrī huī hoñToñ kī laalī
māyūs nazar TuuTā huā dil aur haath bhī paise se ḳhālī

bahut ḳhush-zarf-o-ḳhush-bīñ hai fazā-e-vādī-e-ġhurbat
ba-zāhir hamdam-o-dard-āshnā ma.alūm hotī hai

tū mirī maan kisī aur se shādī kar le
merī ġhurbat to ye rishta nahīñ hone degī

kise kahte haiñ ġhurbat jāntā huuñ
mire dālān meñ khelī huī hai

bhulā chukī dil se shām-e-ġhurbat har ek naqsha har ek sūrat
hamārī āñkhoñ meñ lekin ab tak faroġh-e-sub.h-e-vatan hai baaqī

jaatā huuñ sū-e-vādī-e-ġhurbat ba-hāl-e-zār
ahl-e-vatan muaaf ho merā kahā-sunā

dasht-e-ġhurbat hai ki ābād hamāre dam se
ghar kā āñgan hai ki vīrān huā jaatā hai