Tags-Mehfil

tirī mahfil se uTh kar ishq ke māroñ pe kyā guzrī
muḳhālif ik jahāñ thā jaane bechāroñ pe kyā guzrī

pahroñ tasavvurāt kī mahfil sajī rahī
pahroñ tire ḳhayāl se mahv-e-suḳhan rahe

jalā rahe sham-e-bazm sā.īñ uThā ke pahlū se apne ham ko
raqīb ko misl-e-dil baġhal meñ miyān-e-mahfil biThālte haiñ

un kī mahfil meñ nazar aa.e sabhī sho.ala-ba-kaf
apne dāman meñ magar koī bhī chiñgārī na thī

josh thā hañgāma thā mahfil meñ terī kyā na thā
ik faqat ādāb-e-mahfil kī nigah-dārī na thī

achchhā huā mahfil meñ 'majrūh' na kuchh bolā
vo haal agar kahtā to kis se sunā jaatā

mahfil meñ mujhe dekhā to hañs ke lage kahne
aane se har ik ke hai sohbat kā mazā jaatā

vo shor thā mahfil meñ ki chillā uThā 'vā.iz'
ik jām-e-mai-e-hosh-rubā chāhiye mujh ko

ye ham ne bhuul kī aa pahuñche un kī mahfil meñ
par un se arz-e-tamannā to bhuul kar bhī nahīñ

ham ne sochā tirī āñkheñ to uTheñ lab to hileñ
is liye ham tirī mahfil se chale aa.e haiñ

naḳhvat hai jis ke kāsa-e-sar meñ bharī hui
kab mustahiq hai mahfil rindāñ meñ jaam kā

dekhnā chāho to zaḳhmoñ kā charāġhāñ har-samt
mahfil-e-ġhair vahī anjuman-e-dil bhī vahī

mahv-e-hairat haiñ to donoñ haiñ tirī mahfil meñ
ham se pardā huā ā.īñe se pardā na huā

naam aatā hai mirā jab bhī kisī mahfil meñ
ye batāo ki savālāt se Darte kyuuñ ho

ai dil-e-hañgāma-ḳhū takrār itnī bhī na kar
tañg aa kar tujh ko mahfil se uThā denā paḌe

charāġh-e-yās-o-hasrat ham haiñ mahfil meñ hasīnoñ kī
jalā.e jis kā jī chāhe bujhā.e jis kā jī chāhe