ye na ho vo bhūlne vaalā bhulā denā paḌe
aur phir ye raaz us ko bhī batā denā paḌe
ai dil-e-hañgāma-ḳhū takrār itnī bhī na kar
tañg aa kar tujh ko mahfil se uThā denā paḌe
Thaan rakkhī hai ki dil kī baat kahnī hai zarūr
us kī ḳhātir ḳhvāh mahshar hī uThā denā paḌe
aañkh vāloñ ke karam se aaj vo raat aa ga.ī
jab kisī andhe ke hāthoñ meñ diyā denā paḌe
dekhnā hai aag meñ kaisā nazar aatā hai shahr
ḳhvāh puurā shahr hī ham ko jalā denā paḌe