dard kī raat ne ye rañg bhī dikhlā.e haiñ
merī palkoñ pe sitāre se utar aa.e haiñ
dil ke vīrāne meñ kis yaad kā jhoñkā guzrā
kis ne is ret meñ ye phuul se mahkā.e haiñ
ham ne sochā tirī āñkheñ to uTheñ lab to hileñ
is liye ham tirī mahfil se chale aa.e haiñ
jin se insān ke zaḳhmoñ kā mudāvā na huā
aaj vo chāñd sitāroñ kī ḳhabar laa.e haiñ
chand sikkoñ kī talab hasrat-e-bejā to na thī
phir bhī ham phaile hue haath se ghabrā.e haiñ