Tags-Ada

rakhtā hai ik salīqa-e-iz.hār muḳhtalif
sab mo'tarif 'ḳhalīl' kī tarz-e-adā ke haiñ

khub ga.ī dil meñ har adā us kī
kaj-adā.ī bhī ḳhush-adā sī hai

nāz-o-nigah ravish sabhī laagū haiñ jaan ke
hai kaun adā vo terī ki jo jāñ-sitāñ nahīñ

kyā lazzat-e-visāl adā ho bayān se
sab harf chipke jaate haiñ merī zabān se

mo'tariz kyuuñ hai zamāna mirī betābī par
ḳhāmushī kī hī adā hai ye takallum to nahīñ

apne bīmār-e-mohabbat ko na taḌpāo tum
phir dikhā lenā unheñ nāz-o-adā mere ba.ad

ik jism haiñ ki sar se judā hone vaale haiñ
ham bhī zabāñ se apnī adā hone vaale haiñ

har adā par tirī fidā huuñ maiñ
aa.ina ban ke dekhtā huuñ maiñ

vo ham pe aaj bahut jalva-bār hai kyā hai
ab is adā meñ adāvat hai, pyaar hai, kyā hai

ham jahāñgīr haiñ ik nūr-e-jahāñ rakhte haiñ
us kī chāleñ to nahīñ us kī adā chāhte haiñ

shab ko vo hathelī se un kā sharmā ke chhupānā āñkhoñ ko
barchhī kā adā kī chal jaanā us tīr-e-nazar kā rah jaanā

yuuñ tire naqsh-e-kaf-e-pā pe adā kī hai namāz
sar meñ ka.aba ke liye ek bhī sajda na rahā

ḳhudā kā shukr adā kiije ḳhush-nasībī par
'hafīz' aap dil-e-ġham-shanās rakhte haiñ

maiñ der tak tujhe ḳhud hī na roktā lekin
tū jis adā se uThā hai usī kā ronā hai

kyuuñ ho sakeñ jagat ke dilbar tire barābar
tū husn haur adā meñ ejaaz hai sarāpā

jag ke adā-shanāsāñ hai jin kī fikr aalī
tujh qad kuuñ dekh bole yū naaz hai sarāpā

vo nāznīñ adā meñ ejaaz hai sarāpā
ḳhūbī meñ gul-ruḳhāñ suuñ mumtāz hai sarāpā

sar-e-ham-sarī husn-o-nāz-o-adā meñ na rakhtā thā koī na rakkhegā koī
tirā aks-e-ā.īna hai aur tū hai jo laḌnā hai tujh ko to apne hī se laḌ

sar jhukāne kī us ne adā siikh lī
jo hamesha razā-e-ḳhudā se chalā

vo milā ke nazar is adā se chalā
jaise milne kisī apsarā se chalā