hamesha tamannā-o-hasrat kā jhagḌā hamesha vafā-o-mohabbat kā hullaḌ
thame kyā tabī.at ruke kis tarah dil ye aafat vo fitna ye āñdhī vo jhakkaḌ
jo rāz-e-mohabbat ko jānegā koī to ye jaan le vo machā degā gaḌbaḌ
nazar kī tarah baḌh nazar kī tarah ruk nazar kī tarah mil nazar kī tarah laḌ
mire dil ke hāthoñ se bahr-e-vafā meñ mirī zindagī meñ na ho jaa.e gaḌbaḌ
kabhī kasrat-e-rañj-o-ġham kā thapeḌā kabhī josh-e-ummīd-o-hasrat kī ojhaḌ
kahāñ maiñ huuñ aisā ki tū mehrbāñ ho kahāñ qismat aisī ki āsāñ ho mushkil
agar aur gāhak nahīñ koī terā to ai ḳhanjar-e-nāz mere gale paḌ
bashar kyā farishte jo pīTeñ DhiñDhorā to kyuuñ kar chhupe raaz kam-baḳht dil kā
idhar aah niklī hamārī zabāñ se udhar mach gayā saarī duniyā meñ hullaḌ
sar-e-ham-sarī husn-o-nāz-o-adā meñ na rakhtā thā koī na rakkhegā koī
tirā aks-e-ā.īna hai aur tū hai jo laḌnā hai tujh ko to apne hī se laḌ
bahār-e-javānī hayāt-e-javānī na ye ġhair-fānī na vo ġhair-fānī
urūs-e-chaman kā utartā hai gahnā ḳhizāñ ke zamāne meñ hotī hai patjhaḌ
hazāroñ mare haiñ hazāroñ mare haiñ hazāroñ mareñge hazāroñ miTeñge
vo insāñ nahīñ us ko samjho farishta jo bardāsht kar le mohabbat kī ojhaḌ
vo arz-e-tamannā ko fariyād samjhe vo fariyād ko ġham kī rūdād samjhe
zarā sī mirī baat thī lekin us kā huā rafta rafta kahāñ tak batañgaḌ
udhar aish-o-ishrat idhar yās-o-hasrat jahāñ vaale dekheñ jahāñ kī do-rañgī
kahīñ koī paiham bachātā hai baġhleñ koī pīTtā hai kahīñ sar dhaḌā-dhaḌ
mohabbat ne chhoḌā ye turfa shagūfa bahār-e-javānī bhī dil ne na dekhī
abhī phūlne-phalne ke din kahāñ the magar kaT ga.ī naḳhl-e-ummīd kī jaḌ
jo ik jañg-jū idrāk sulh-jū ho to jhagḌā na uTThe bakheḌā na uThe
dil-o-dil-rubā meñ nibhe kyā mohabbat udhar vo bhī ziddī idhar ye bhī akkhaḌ
kiye saikḌoñ ahd-o-paimān-e-ulfat magar ḳhair se koī sachchā na niklā
vo kahte haiñ milne ko ab hashr ke din kahīñ ho na jaa.e kuchh us din bhī gaḌbaḌ
muqaddar meñ likkhā thā hun kar bigaḌnā koī kyuuñ na martā koī kyuuñ na uThtā
zamīñ-doz ahl-e-zamīñ ho ga.e sab paḌī āsmāñ se vo sar par do-hatthaḌ
jo nāvak chale aur talvār niklī to qaa.em rahā maiñ hī ahd-e-vafā par
kisī ne kisī ko bhī phir kar na dekhā paḌī imtihāñ-ghar meñ kuchh aisī bhāgaḌ
samajhte haiñ āġhāz-o-anjām apnā mah-o-mehr kyā ā.eñge tere aage
idhar se udhar un kā phir jā.egā muñh lagā.egī sharmindagī aisā thappaḌ
ḳhayāl-o-tasavvur meñ hargiz na laanā hañsī dil-lagī meñ hamesha uḌānā
mire da.av-e-ishq kī qadr kyā ho vo is ko samajhte haiñ majzūb kī baḌ
jahāñ dekhtā huuñ vahāñ dekhtā huuñ jidhar dekhtā huuñ udhar dekhtā huuñ
mohabbat kī shorish mohabbat kī ūdham mohabbat kā ġhauġhā mohabbat kā hullaḌ
mazā jab hai aapas meñ kuchh jañg bhī ho mazā jañg meñ jab hai kuchh sulh bhī ho
dikhā de talavvun kā apne tamāshā idhar laḌ udhar mil idhar mil udhar laḌ
bahāyā mazāmīn kā tum ne dariyā ġhazal meñ bahut ḳhuub ash.ār likkhe
zamāne ko ai 'nūh' hairat na kyuuñ ho ki tūfān aisā zamīn aisī gaḌbaḌ