Tags-Hawa

udhar to daar par rakkhā huā hai
idhar pairoñ meñ sar rakkhā huā hai

kam az kam is sarāb-e-ārzū ne
mirī āñkhoñ ko tar rakkhā huā hai

samajhte kyā ho ham ko shahr vaalo
bayābāñ meñ bhī ghar rakkhā huā hai

ham achchhā maal to bilkul nahīñ haiñ
hameñ kyuuñ bāñdh kar rakkhā huā hai

mire hālāt ko bas yuuñ samajh lo
parinde par shajar rakkhā huā hai

jihālat se guzāra kar rahā huuñ
kitāboñ meñ hunar rakkhā huā hai

ḳhud se bāhar nikal jā.ūñ maiñ aur ḳhud ko 'zafar'
koī din jañgaloñ kī havā ke liye chhoḌ duuñ

mujhe to chaak kī gardish ne Dhālā
huā hai naam saarā kūza-gar kā

raqs-e-kākul ke tasavvur kī ye shīrīñ saa.at
shab ke phūloñ se mahaktā huā ban māñge hai

yahī sochte sochte mujh ko niiñd aa ga.ī
aur havā der tak mere kānoñ meñ kahtī rahī

bujh gayā maiñ to ġhazal paḌh ke vo jis meñ tū thā
par huā bazm kī raunaq meñ izāfa mujh se

havā kī tarah musāfir the dilbaroñ ke dil
unheñ bas ek hī ghar kā azaab kyā dete

bahār aate hī yuuñ lagā ki chaman darīda-dahan huā hai
gulāb-rut meñ chaman pe nāzil ye āfateñ bhī na.ī nahīñ haiñ

ai zamistāñ kī huā tez na chal
is qadar tez na ho mauj-e-subuk-ḳhez kī rau

dil kitnā ābād huā jab diid ke ghar barbād hue
vo bichhḌā aur dhyān meñ us ke sau mausam ījād hue

merā kyā ik mauj-e-havā huuñ par yuuñ hai ai ġhuncha-dahan
tū ne dil kā baaġh jo chhoḌā ġhunche be-ustād hue

hazār rāste pinhāñ haiñ reg-e-sahrā meñ
jo dam meñ dam ho to is dasht kī havā dekhūñ

hai ḳhabar garm un ke aane kī
aaj hī ghar meñ boriyā na huā

Doltī hai saañs ke tūfāñ meñ kashtī ziist kī
bādbānī ke liye ab ke havā hai muḳhtalif

chashm-e-hairat se na yuuñ dekhā kareñ 'shāhīn-badr'
mausam-e-iḳhlās kī ThanDī havā hai muḳhtalif