Tags-Hawa

ġham-e-ishq paidā huā mere saath
use guzrī ik umr palte hue

ab koī biis baras ba.ad ye ehsās huā
chāhte ham to kahīñ haath chhuḌā bhī lete

āh-e-girya saath hoñ ġhurbat meñ jab aatā hai dhyān
bekasī kahtī hai ye āb-o-havā ke haath hai

mujh ko hai taslīm qafas meñ phūloñ ke haiñ saa.e kam
haa.e magar vo jin ko chaman kī āb-o-havā raas aa.e kam

naqsh kartā ram-o-raftār ināñ-gīr ko maiñ
kaisā chhankātā huā chaltā huuñ zanjīr ko maiñ

nazm ho baiThā huuñ āhañg-daroñ ke hāthoñ
nazm kartā huā ik nāla-e-shab-gīr ko maiñ

isī jagah isī din to huā thā ye elaan
añdhere haar ga.e zindabād hindostān

ye umr kī hai basar kuchh ajab tavāzun se
tirā huā na hī ḳhud se nibāh maiñ ne kiyā

laakh āñchal havā ke haath meñ the
sar-barahna magar khaḌā thā koī

apnī marzī se kaun qatl huā
apnī marzī se kab jiyā thā koī

rūh-e-ruvān-o-jism kī sūrat maiñ kyā kahūñ
jhoñkā havā kā thā idhar aayā udhar gayā

bad-mazgī-e-sulūk kā gahrā asar huā
ik kañkarī sī mere nivāle meñ rah ga.ī

tū koī sūkhā huā patta nahīñ hai ki jise
jis taraf mauj-e-havā chāhe uḌā kar le jaa.e

ūñchī uḌeñ havā meñ bachchoñ ko par na bhūleñ
in be-paroñ kā un ko rozī-rasāñ banāyā

rañg badlā phir havā kā mai-kashoñ ke din phire
phir chalī bād-e-sabā phir mai-kade kā dar khulā

ḳhanjar-e-qātil se jannat kī havā aane lagī
aur bahār-e-zaḳhm se firdaus kā manzar khulā

maiñ ne bhī tauba toḌ dī apnī to kyā huā
duniyā ke log kyā nahīñ karte bahār meñ

raqs-e-sharar kyā ab ke vahshat-nāk huā
jalte jalte sab kuchh jal kar ḳhaak huā

sab ko apnī apnī paḌī thī pūchhte kyā
kaun vahāñ bach niklā kaun halāk huā

mausam-e-gul se fasl-e-ḳhizāñ kī duurī kyā
aañkh jhapakte saarā qissa paak huā