Tags-Hawa

bahut kuchh chhupāyā bahut kuchh bachāyā magar pesh-bañdī na kuchh kaam aa.ī
kiye ḳhanjar-e-nāz ne chaar TukḌe bil-āḳhir huā dil mohabbat meñ chaupaT

sitam bhī uThā.e hazāroñ tarah ke balā.eñ bhī jhelīñ hazāroñ tarah kī
huā tajraba ham ko ye dil lagā kar hasīnoñ se dil kā lagānā hai jhanjhaT

thī sukūt-e-dil se pahle bazm-e-hastī par ḳharosh
phir vo sannāTā huā taarī ki ham ghabrā ga.e

ḳhanjar kā vaar karte hī qātil ravāñ huā
armān-e-dīd dīda-e-bismil meñ rah gayā

vahshat-fazā bahut thī havā dasht-e-qais kī
parda kisī kā parda-e-mahmil meñ rah gayā

'mahrūm' dil ke haath se jaañ thī azaab meñ
achchhā huā ki yaar kī mahfil meñ rah gayā

aa ki maiñ dekh luuñ khoyā huā chehra apnā
mujh se chhup kar mirī tasvīr banāne vaale

falak hai sar pe udāsī kī tarah phailā huā
zamīñ nahīñ hai mire zer-e-pā udāsī hai

uzr havā ne kyā rakkhā hai
kaisā shor machā rakkhā hai

tū zid se shab-e-vasl na aayā to huā kyā
ham mar na ga.e dil ko kuḌhāyā to huā kyā

tasvīr-e-nihālī se ham-āġhosh rahe ham
gar aa ke na saath apne sulāyā to huā kyā

dekhā hī kiye tere tasavvur meñ qamar ko
gar tā-sahar ai yaar! jagāyā to huā kyā

phūloñ kī rahī sej jo ḳhālī to balā se
añgāroñ pe gar ham ko liTāyā to huā kyā

muñh laal huā ġhuncha-sifat ḳhūn-e-jigar se
hāthoñ se tire paan na khāyā to huā kyā

behtar ye huā nāma-o-paiġhām se chhūTe
gar aap na aayā na bulāyā to huā kyā

dushman kā uḌāne ko dhuāñ ye bhī bahut haiñ
ġhairoñ ke sikhāne se jalāyā to huā kyā

mar jaane se to ham rahe juuñ panja-e-marjāñ
haath apnā jo mehñdī se bañdhāyā to huā kyā

tū aap hī dekh uñgliyoñ kī fundaqeñ uudī
jāmun ke jo paudoñ ko lagāyā to huā kyā

dekhā hai bahut bhān-matī kā ye tamāshā
sarsoñ ko hathelī pe jamāyā to huā kyā

ham sarv-e-chaman dil kī har ik aah ko samjhe
apnā qad-e-mauzūñ na dikhāyā to huā kyā