Tags-Hawa

maiñ ā.īna dekh rahā huuñ lekin ye kyā dekh rahā hai
merā aks pas-e-hairānī miTTī aag havā aur paanī

ishq kī nisbat se haiñ zinda sahrā sūraj bādal dariyā
ishq nahīñ to sab be-ma.anī miTTī aag havā aur paanī

rasūl-e-maslūb ke do hazār barsoñ ke ba.ad ye vāqi.a huā
ye us zamāne kī baat hai jab rasūl-e-ḳhurshīd rās-ul-aflāk par chamaktā thā

bistar pe pichhlī raat ajab mājrā huā
āñkheñ thiiñ band uḌtā rahā maiñ ḳhalāoñ meñ

maiñ kab se dekh rahā huuñ ajiib sī harakat
mirā likhā huā kuchh log haiñ miTāte hue

dasht meñ jo bhī hai jaisā mirā dekhā huā hai
rāsta us ke safar kā mirā dekhā huā hai

kis liye chīḳhtā chiñghāḌtā rahtā hai bahut
mauj-dar-mauj ye dariyā mirā dekhā huā hai

vaqt ke saath jo tabdīl huā kartā hai
aa.ina aa.ina chehrā mirā dekhā huā hai

rañg-o-roġhan mirī tasvīr ko dene vaalā
āb-e-shafāf hai kitnā mirā dekhā huā hai

kis tarah tujh ko ye batlā.ūñ havā ke jhoñke
ret par likkhā hai kyā kyā mirā dekhā huā hai

kis jagah kaun gaḌā hai mujhe ma.alūm hai sab
is tire shahr kā naqsha mirā dekhā huā hai

raat ke ba.ad sahar hotī hai raushan 'tanvīr'
hai añdhere meñ ujālā mirā dekhā huā hai

ta.alluqāt ko TuuTe hue zamāna huā
vo ik nigāh magar aaj bhī savālī hai

kunj-e-tanhā.ī meñ rakkhā huā rah jaatā hai
dil ki siine meñ uchhaltā huā rah jaatā hai

jumbish-e-chashm se duniyā hī badal jaatī hai
aur mirī aañkh meñ sochā huā rah jaatā hai

ab to aisā hai ki āñkhoñ ko agar khol bhī luuñ
dil kisī ḳhvāb meñ lipTā huā rah jaatā hai

likh to lete haiñ tirā naam ba-sad shauq magar
kyā kabhī ret pe likkhā huā rah jaatā hai

kuchh chalā jaatā hai dariyāoñ ke hamrāh ye dil
kuchh rag-e-jāñ meñ hī bahtā huā rah jaatā hai

us kī yādoñ ko dil-o-jān se ruḳhsat karnā
kaam aisā hai ki hotā huā rah jaatā hai

maiñ to lauT aatā huuñ har shaam ko ghar meñ lekin
dil kisī raah pe chaltā huā rah jaatā hai