Tags-Hawa

havā jab tez chaltī hai
shikasta ḳhvāb jab maTiyāle rastoñ par

ghane añdhere meñ raushnī kī kalī khilī hai bahut bhalī hai
ghuTan se dam TūTne lagā to havā chalī hai bahut bhalī hai

aTak rahā thā añdherā sāñsoñ meñ ḳhauf ḳhuuñ meñ gilā huā thā
ai sub.h-e-kāzib jo chhoḌ kar zinda shab Talī hai bahut bhalī hai

hijr to pahle bhī aayā thā lekin ab vahshat hai aur
chaltī havā se laḌte haiñ ham ek parī-timsāl ke ba.ad

nahīñ huā aur phir kahne ko yahāñ ho
harīf-e-bad-gumāñ ke ham gumāñ ho

maiñ apne-āp meñ bikhrā huā huuñ muddat se
agar maiñ ḳhud ko sameTūñ to zindagī kam hai

khulī chhatoñ pe dupaTTe havā meñ uḌte nahīñ
tumhāre shahr meñ kyā āsmān bhī kam hai

huuñ musalsal safar meñ misl-e-havā
ḳhud-sarī merī rahnumā hai mujhe

udaas bas ādatan huuñ kuchh bhī huā nahīñ hai
yaqīn maano kisī se koī gila nahīñ hai

usī kī ḳhushbū se aaj tak maiñ mahak rahā huuñ
vo mujh se bichhḌā huā hai lekin judā nahīñ hai

likhā huā hai tumhāre chehre pe ġham tumhārā
hamārī hālat bhī aisī be-mājrā nahīñ hai

mad.hosh huā dil kyuuñ bechain hai kyuuñ āñkheñ
huuñ duur mai-ḳhāne se phir kyuuñ ai ḳhumār aa.e

karegā kaun tirī vus.atoñ kā andāza
jo ham-kanār huā be-kanār ho gayā thā

ek ye naubat ki vahshat DhūñDhtā phirtā huuñ maiñ
ek vo mausam ki gulshan kī huā sahrā.ī thī

āñkhoñ se ḳhuun apne ye kahtā nahīñ na jaa.e
par saath us ke lipTā huā dil kahīñ na jaa.e

koī phuul dhuup kī pattiyoñ meñ hare ribbon se bañdhā huā
vo ġhazal kā lahja nayā nayā na kahā huā na sunā huā

jise le ga.ī hai abhī havā vo varaq thā dil kī kitāb kā
kahīñ āñsuoñ se miTā huā kahīñ āñsuoñ se likhā huā

ka.ī miil ret ko kaaT kar koī mauj phuul khilā ga.ī
koī peḌ pyaas se mar rahā hai nadī ke paas khaḌā huā

vahī ḳhat ki jis pe jagah jagah do mahakte hoñToñ ke chāñd the
kisī bhūle-bisre se taaq par tah-e-gard hogā dabā huā

mujhe hādsoñ ne sajā sajā ke bahut hasīn banā diyā
mirā dil bhī jaise dulhan kā haath ho mehñdiyoñ se rachā huā