Tags-Hawa

vahī shahr hai vahī rāste vahī ghar hai aur vahī lawn bhī
magar is darīche se pūchhnā vo daraḳht anaar kā kyā huā

mire saath jugnū hai ham-safar magar is sharar kī bisāt kyā
ye charāġh koī charāġh hai na jalā huā na bujhā huā

jis dil ko tum ne lutf se apnā banā liyā
us dil meñ ik chhupā huā nashtar zarūr thā

ajiib baat hamārā hī ḳhuuñ huā paanī
hamīñ ne aag meñ apne badan bhigo.e the

vo mujh se tālib-e-bai.at huā hai aur mujhe
junūñ ke haath pe dast-e-savāl rakhnā hai

kahīñ to ḳhatm huā hogā raat kā afsūñ
vahīñ pe uqda-e-sub.h-e-visāl rakhnā hai

yaad aa.ī bahut ham ko TuuTī huī tauba bhī
dekhā jo kahīñ ham ne TuuTā huā paimāna

nādān dil ko us se vafā kī umiid hai
jo bevafā kisī kā abhī tak huā nahīñ

har surāġh apnī jagah ret meñ mādūm huā
duur tak naqsh-e-kaf-e-pā bhī nahīñ hai koī

ek hī satr likhī thī ki ye ehsās huā
lafz aur ma.anī meñ rishta bhī nahīñ hai koī

'qatīl' ab dil kī dhaḌkan ban ga.ī hai chaap qadmoñ kī
koī merī taraf aatā huā mahsūs hotā hai

shaiḳh-e-haram us but kā parastār huā hai
but-ḳhāna-nashīñ bāñdh ke zunnār huā hai

har harf pe do aañsū Tapak paḌte haiñ ai vaa.e
ḳhat yaar ko likhnā hameñ dushvār huā hai

kotah na samajh āh-e-zaīfān ko ye tiir
sau baar dil-e-arsh se bhī paar huā hai

ai said-fagan ġham se tire duurī ki merā
har zaḳhm-e-dil ik dīda-e-ḳhūñ-bār huā hai

hastī tirī parda hai uThā de ise ġhāfil
kyuuñ aisā hijāb-e-ruḳh-e-dildār huā hai

aage tire thī garm-e-suḳhan hone kī hasrat
so bharnā dam-e-sard bhī dushvār huā hai

kar qadr tū 'rāsiḳh' kī ki is tarah kā āzād
yuuñ daam meñ aa tere giraftār huā hai

ye kyā huā ki aaj bahut tez dhuup hai
saaya milā na shāḳh-e-tanāvar ke ās-pās

minqār se havā ne likhī dāstān-e-hijr
yuuñ harf-e-mo'tabar ko bhī nā-mo'tabar kiyā