Tags-Hawa

sunā hai us ke ahd-e-vafā meñ havā bhī muft nahīñ miltī
un galiyoñ meñ har har saañs pe bharte haiñ jurmāne log

na aisā ho magar aisā huā to kyā hogā
sukūñ talāsh karegā kahīñ na pā.egā

havā ko aate jab dekhā
raushan kiyā diyā maiñ ne

parcham sā lahrāyā huuñ
khaa.ī tez havā maiñ ne

paash paash huā phir bhī
sar ūñchā rakkhā maiñ ne

kis nazar se aap ne dekhā dil-e-majrūh ko
zaḳhm jo kuchh bhar chale the phir havā dene lage

aisī yaḳh-basta havā meñ koñpleñ phūTeñgī kyaa?
bārishoñ kī aarzū be-barg shāḳheñ kyā kareñ

husn ko jo manzūr huā
ishq kā vo maqdūr huā

pardoñ meñ uryāñ thā husn
jalvoñ meñ mastūr huā

jitne ham nazdīk ga.e
itnā hī vo duur huā

kitnī aaseñ TuuT ga.iiñ
kitnā dil ranjūr huā

muḳhtārī kī shaan milī
kyā insāñ majbūr huā

pal bhar kashtī Thahrī thī
barsoñ sāhil duur huā

haq kī bāteñ samjhe kaun
jo samjhā mansūr huā

aag na thī to patthar thā
aag jalī to tuur huā

mil kar aaj 'tabassum' se
kitnā dil masrūr huā

ye huā ma.amūl ki mānūs-e-ġham dil ho gayā
ham samajh baiThe hamāre dard kuchh kam ho ga.e

āñgan meñ jaise ek charāġhāñ sā ho gayā
aisā kahāñ se laa.ī thī shab ko havā diyā

us kā matlab to ye huā
ki sirf shā.ir honā

vaar huā kuchh itnā gahrā paanī kā
niklā chaTTānoñ se rasta paanī kā