Tags-Hawa

maiñ ne betābāna baḌh kar dasht meñ āvāz dī
jab ġhubār uTThā kisī dīvāne kā dhokā huā

niiñd uchaT jā.egī in matvālī āñkhoñ kī na sun
merī hastī kā fasāna hai bahut uljhā huā

dil se Takrā jaatī hai rah rah ke koī mauj 'zeb'
shab kā sannāTā koī bahtā huā dariyā huā

phūloñ ko DhūñDtā huā phirtā huuñ baaġh meñ
bād-e-sabā ko kaam dilānā hai aur bas

aab o havā to yuuñ bhī mirā mas.ala nahīñ
mujh ko to ik daraḳht lagānā hai aur bas

ilāhī koī havā kā jhoñkā dikhā de chehra uḌā ke āñchal
ki jhāñktā bhī hai vo sitam-gar to khaḌkhaḌī meñ lagā ke āñchal

usī ke faiz se nā-mehrbāñ huā hai dil
makāñ mizāj hamesha makīñ kā rakhte haiñ

havā ḳhāmosh patte so rahe haiñ
abhī shāḳhoñ pe ġhunche so rahe haiñ

tamām koh-o-til-o-bahr-o-bar haiñ zer-e-nagīñ
khulā huā huuñ maiñ shāhīñ ke bāl-o-par kī tarah

jā.egā tū jahāñ bhī rahūñgā maiñ tere saath
tū abr-e-be-niyāz to bahtī havā huuñ maiñ

phir yuuñ huā ki raushnī had se sivā huī
ḳhurshīd-e-zau-fishār thā dekho bujhā huuñ maiñ

hotā zafar qarār jo nashtar nahīñ huā
'jāved' dasht-e-sher meñ be-dast-o-pā huuñ maiñ

tarāsh kar mire baazū uḌaan chhoḌ gayā
havā ke paas barahna kamān chhoḌ gayā

jāñ-fishānī ham us pe karte haiñ
raam hargiz na vo huā gustāḳh

faisle saare kahīñ aur huā karte haiñ
merī rusvā.ī mire haath na samjhī jaa.e

maiñ pahle be-bāk huā thā josh-e-mohabbat meñ
merī tarah phir us ne bhī sharmānā chhoḌā thā

huā na mujh se koī ham-kalām gardish meñ
dhuāñ hue haiñ mire sub.h-o-shām gardish meñ

ḳhayāl-o-ḳhvāb huā har zamāna-e-vahshat
utar chuke haiñ sabhī ḳhush-ḳhirām gardish meñ

rukā huā huuñ maiñ ik gardishī jazīre par
guzar rahe haiñ mire sub.h-o-shām gardish meñ

charāġh le ke phirā DhūñDhtā huā ghar ghar
shab-e-firāq jo mujh ko rahī sahar kī talāsh