Tags-Hawa

vaadī meñ ghūmtā huā bārish kā jal-tarañg
sāñsoñ meñ gūñjtā huā ik an-kahī kā bhed!

jhūTī gavāhiyoñ kī badaulat vo bach gayā
sach boltā huā maiñ abhī kaTghare meñ huuñ

ajab ghar haiñ ki jin meñ koī khiḌkī hai na darvāza
havā ke aane jaane kā to rasta chhoḌ denā thā

ik din tire āñchal kī havā ban ke uḌe the
us din se zamāne kī nigāhoñ se nihāñ haiñ

banā diyā use ḳhud-bīn o ḳhud-numā 'beḳhud'
huā hai ā.īna-e-husn-e-yār dil merā

har ek moḌ pe ham ne bahut sadā.eñ diiñ
safar tamām huā ham-safar nahīñ aayā

tum ne sab kuchh kiyā insān kī izzat nahīñ kī
kyā huā vaqt ne jo tum se ri.āyat nahīñ kī

havā se TuuT ke girnā mirā muqaddar thā
ki zard pattā thā kyūñkar maiñ shāḳh par rahtā

qaus par se umuud uThtā huā
ya.anī phir jal uThā hai ḳhvāb us kā

dā.era dā.ere ko chhūtā huā
aur qausain par hijāb us kā

is tarah chashm-e-nīm-vā ġhāfil bhī thī bedār bhī
jaise nasha ho raat kā yā sub.h kā taḌkā huā

jo tire ishq meñ tabāh huā
koī us ko tabāh kar na sakā

rañg aur ḳhushbū se dhundlā.e rastoñ meñ
havā kī uñglī thaam ke chaltā rahtā huuñ

sub.h-o-shām havā kī andhī lahroñ meñ
zarra zarra ho ke bikhartā rahtā huuñ

tarab-āshnā-e-ḳharosh ho to navā hai mahram-e-gosh ho
vo sarod kyā ki chhupā huā ho sukūt-e-parda-e-sāz meñ

maiñ jo sar-ba-sajdā huā kabhī to zamīñ se aane lagī sadā
tirā dil to hai sanam-āshnā tujhe kyā milegā namāz meñ

matlūb hai kyā ab yahī kahte nahīñ bantī
dāman to baḌe shauq se phailāyā huā thā

aisā huā nahīñ hai par aisā na ho kahīñ
us ne mujhe na dekh ke dekhā na ho kahīñ

baras rahī thiiñ bahāreñ taras rahī thī zamīñ
safar tamām huā phuul kab khilā dil kā

ḳhushbū to muddatoñ kī zamīñ-doz ho chukī
ab sirf pattiyoñ ko havā meñ uchhāliye