hamāre haal se koī jo bā-ḳhabar rahtā
ḳhayāl us kā hameñ bhī to umr-bhar rahtā
jise bhī ḳhvāhish-e-dīvār-o-dar ho sahrā meñ
vo kam-nasīb to achchhā thā apne ghar rahtā
havā se TuuT ke girnā mirā muqaddar thā
ki zard pattā thā kyūñkar maiñ shāḳh par rahtā
jo dekhtā huuñ zamāne kī nā-shanāsī ko
ye sochtā huuñ ki achchhā thā be-hunar rahtā
hamārī vaj.h se hotī na terī rusvā.ī
hamāre saath agar tū na is qadar rahtā
tazād qaul-o-amal meñ ho jis ke ai 'nādir'
vo shaḳhs kaise nigāhoñ meñ mo'atabar rahtā