Tags-Hawa

sāñseñ sisaktī rah ga.iiñ dīvār-o-dar ke biich
barpā huā thā chhat pe nayā inqalāb ek

ye hirs-o-havā kī manzil hai ai rāh-ravo hushyār zarā
jab haath rupahle baḌhte haiñ rahbar ke qadam bik jaate haiñ

mujh se kahā jo yaar ne jaate haiñ hosh kis tarah
dekh ke merī be-ḳhudī chalne lagī havā ki yuuñ

sar uThā.e thiiñ bahut surḳh havā meñ phir bhī
ham ne palkoñ ke charāġhoñ kī hifāzat kī hai

shā.irī meñ bāzuoñ ke saath dil bhī shal huā
āḳhirash majbūr ho kar haar dī ye race bhī

vahī hai hijr kī rut kī udāsī
vahī qātil havā hai aur maiñ huuñ

vahī hai bādiya-paimā.ī apnī
vahī āb-o-havā hai aur maiñ huuñ

huā hai dair-o-haram meñ jo mo.atakif vo yaqīn
takān-e-kashmakash-e-ehtimāl hai shāyad

gumāñ huā hai ye amboh se javāboñ ke
savāl ḳhud hī javāb-e-savāl hai shāyad

chāhe jañgal hoñ yā sahrā yā nagar
asl meñ tū hai havā kī zindagī

tīrgī ab siyah-samundar hai
aur havā ho ga.ī hai dīvānī

huī jo shaam rāste gharoñ kī samt chal paḌe
hameñ magar ye kyā huā ye ham kidhar nikal paḌe

vo jo jhoñke jaisā aatā jaatā hai
ham jo havā ko chhū kar bikhrā karte haiñ

itne dukhī is darja udaas jo saa.e haiñ
raat ke dasht meñ tez havā se laḌe hoñge

ḳhudā bachā.e bagūloñ kī zad meñ aa.e haiñ
vo barg-e-sabz jo mauj-e-havā se Darte rahe

maiñ is ke dhyān meñ is darja gum huā ik din
pata chalā hī nahīñ kab gayā vo aayā kab

jhoñkā ye kis ke lams-e-gurezāñ kī tarah thā
ab hal hī karte rahiye havā ke savāl ko

shab bhar havā ke rañg badalte rahe na.e
maiñ dekhtā rahā safar-e-bar-shaġhāl ko

phir aa ga.ī ik but pe tabī.at ko huā kyā
Taltī hī nahīñ sar se musībat ko huā kyā

mahrūm phir aayā dar-e-mai-ḳhāna se vaa.iz
rindān-e-qadah-ḳhvār kī himmat ko huā kyā