Tags-Hawa

kis vāste boltā nahīñ tū
kyā mujh se huā gunāh zālim

kis kī ḳhātir darīchoñ se aa.ī havā
ye fazā yuuñ baham kis ke hone se hai

khetiyāñ suukh ga.iiñ ḳhushk hue dil ke nagar
bāvar aayā hameñ paanī kā havā ho jaanā

sar se saare ḳhvān ḳhushbū ke bikhar kar rah ga.e
ḳhāk-e-ḳhema tak havā pahuñchī to dīvānī huī

dard jab jab uThā huā mahsūs
choT kab kab lagī nahīñ mālūm

kūza-e-duniyā hai apne chaak se bichhḌā huā
aur us ke biich maiñ aflāk se bichhḌā huā

us jagah maiñ bhī bhaTaktā phir rahā huuñ aaj tak
jis jagah thā rāsta pechāk se bichhḌā huā

din guzarte jā rahe haiñ aur hujūm-e-ḳhush-gumāñ
muntazir baiThā hai aab o ḳhaak se bichhḌā huā

sub.h-dam dekhā to ḳhushkī par taḌaptā thā bahut
ek manzar dīda-e-namnāk se bichhḌā huā

is jahān-e-ḳhasta se koī tavaqqo hai abas
ye badan hai ruuh kī poshāk se bichhḌā huā

jab bhī taulā be-niyāzī kī tarāzū meñ use
vo bhī niklā zabt ke idrāk se bichhḌā huā

ik sitāra mujh se mil kar ro paḌā thā kal 'jamāl'
vo falak se aur maiñ thā ḳhaak se bichhḌā huā

jo tum parfum meñ Dupkī lagā kar roz aatī ho
fazā tum se mo.attar hai havā meñ kuchh nahīñ rakkhā

mohalle meñ unheñ kahte haiñ sab sharrunnisā-begam
to ye sābit huā ḳhairunnisā meñ kuchh nahīñ rakkhā

koh-e-ḳhadshāt sar huā hī nahīñ
paar kyā hai maiñ jāntā hī nahīñ

tere hañste hue hoñToñ kā pighaltā huā lams
gungunātā hai mirī ruuh kī tanhā.ī meñ

ātish-e-ishq suuñ tirī jal jal
dil huā dil huā kabāb kabāb

jis din se gayā vo jān-e-ġhazal har misre kī sūrat bigḌī
har lafz pareshāñ dikhtā hai, is darja varaq namnāk huā

jab huā garm-e-kalām-e-muḳhtasar mahkā diyā
itr khīñchā yaar ke lab ne gul-e-taqrīr kā

kyā kyā na paḌhā is maktab meñ, kitne hī hunar sīkhe haiñ yahāñ
iz.hār kabhī āñkhoñ se kiyā kabhī had se sivā bebāk huā