Tags-Hawa

tumheñ manāne kā mujh ko ḳhayāl kyā aa.e
ki apne aap se rūThā huā to maiñ bhī huuñ

phuul khileñ to havā meñ ḳhushbū ho hī jaatī hai tahlīl
dil kī bāteñ samho par un kī tafsīr nahīñ karnā

diyā muñDer pe dil kī jalā rahī huuñ maiñ
havā-mizāj ko vāpas bulā rahī huuñ maiñ

koī paḌāv nahīñ is safar meñ ai 'maḳhmūr'
jo chal paḌe to havā phir kahāñ Thahartī hai

maiñ ḳhud se duur huā jā rahā huuñ phir 'aḳhtar'
vo phir qarīb se ho kar guzar gayā hogā

maiñ ek zarra mirī haisiyat hī kyā hai magar
havā ke saath huuñ uḌte hue ġhubār meñ huuñ

maiñ vo charāġh-e-bazm-e-tamannā huuñ dosto
jis ko sahar se pahle havā ne bujhā diyā

ḳhushiyoñ ke saath rah na sake ek pal kabhī
ya.anī charāġhiyoñ kī havā se nahīñ banī

lamha lamha raakh huā
maiñ bhī kab jaldī meñ thaa?

yā rab tirī rahmat kā talabgār hai ye bhī
thoḌī sī mire shahr ko bhī āb-o-havā de

kahtī hai ye shaam kī narm havā phir mahkegī is ghar kī fazā
nayā kamra sajā na.ī sham.a jalā tire chāhne vaale aur bhī haiñ

hameñ bichhḌe hue arsa huā par
abhī tak dil meñ hai nashsha tumhārā

ab diin huā zamāna-sāzī
āfāq tamām dahriyā hai

chāñdnī sard havā phuul parinde ḳhushbū
rāt-bhar terī zarūrat kā maza letā huuñ

aarzū kā shor barpā hijr kī rātoñ meñ thā
vasl kī shab to huā jaatā hai sannāTā bahut

sūraj chaḌhā to dil ko ajab vahm sā huā
dushman jo shab ko maarā thā vo uTh khaḌā huā

bikhrī huī hai ret nadāmat kī zehn meñ
utrā hai jab se jism kā dariyā chaḌhā huā

zulfoñ kī ābshār sirhāne pe gir paḌī
kholā jo us ne raat ko joḌā bañdhā huā

niklā karo pahan ke na yuuñ muḳhtasar libās
paḌh legā koī lauh-e-badan par likhā huā

ik shaḳhs jis se merā ta.āruf nahīñ magar
guzrā hai baar baar mujhe dekhtā huā