Tags-Hawa

vo merī tasvīr merī ḳhushbū ḳhayāl merā
tumhārā kamra sajā huā hai to maiñ kahāñ huuñ

dil-e-ushshāq kyuuñ na ho raushan
jab ḳhayāl-e-sanam charāġh huā

ret kā ham libās pahne haiñ
aur havā ke safar pe nikle haiñ

gungunātī huī niklī hai ġhusl-ḳhāne se jab bhī
apne bhīge hue bāloñ se Tapaktā huā paanī

kaaT ga.ī kohre kī chādar sard havā kī tezī maap
ukḌūñ baiThā is vaadī kī tanhā.ī meñ thar-thar kaañp

kis se mahrūmī-e-qismat kī shikāyat kiije
ham ne chāhā thā ki mar jaa.eñ so vo bhī na huā

bahut qadīm kā naam hai koī abr-o-havā ke tūfāñ meñ
naam jo maiñ ab bhuul chukā huuñ kaise us ko yaad karūñ

muskurāte hue miltā huuñ kisī se jo 'zafar'
saaf pahchān liyā jāatā huuñ royā huā maiñ

huā hai terī mohabbat kā hausla saaqī
magar garāñ hai qanā.at kā marhala saaqī

hayāt kyā hai mohabbat hai kyuuñ jamāl hai kyā
na hal huā kabhī 'aḳhtar' kā mas.ala saaqī

kabhī tum ne kuchh to diyā nahīñ kabhī ham ne kuchh to liyā nahīñ
hameñ zindagī se ho bahs kyā koī vāqi.a to huā nahīñ

zarā dekhnā ki vo kaun hai pas-e-ramz-e-vahshat-e-āshiqī
bhalā kis ne ham ko shikast dī kabhī pahle aisā huā nahīñ

vo jo mil chukī haiñ aziyyateñ chalo maan leñ ki bahut huā
magar ab milā hai jo hausla kisī aur ko to milā nahīñ

is jazīre par azal se ḳhaak uḌtī hai havā
manziloñ ke bhed phir bhī rāstoñ meñ qaid haiñ

Daaka paḌā to luT ke huā hai ye fā.eda
ham ḳhauf aur hirās se aage nikal ga.e

din ga.e tafrīh ke jab se huā dil ġham-kada
kyā ġharaz ham ko agar duniyā tarab-añgez hai

saañp soyā huā hai baḌī der se
sardiyoñ kī añdherī piTārī meñ kunDal sā lipTā huā

paanī se sag-gazīda Dare jis tarah 'asad'
Dartā huuñ aa.ine se ki mardum-gazīda huuñ

jī ḳhush huā dekhe se ki āzād fazā hai
bastī se guzartā huā sahrā meñ rukā maiñ