Tags-Hawa

mujh ko detī hai Daal Daal huā
chhāñv dete haiñ paat paat mujhe

tujh meñ paḌā huā huuñ harakat nahīñ hai mujh meñ
hālat na pūchhiyo tū hālat nahīñ hai mujh meñ

patte patte se naġhma-sarā kaun hai
ai havā tere andar chhupā kaun hai

ye barf-posh manāzir bhī sho.ala-ḳhū nikle
ye kab huā ki dharo paañv to lahū nikle

naqāb tābish-e-jalva se aab aab huā
ki jaise dhuup meñ koī kinār-e-jū nikle

ye ird-gard ke manzar mire shanāsā haiñ
guzar huā hai isī rahguzar se aage bhī

tū ḳhush-nasīb hai har shaḳhs hai asīroñ meñ
likhā huā hai tire haath kī lakīroñ meñ

sunā.e sach koī to saañs bhī āhista letā huuñ
kahīñ mujh par zarā bhī shak huā to maarā jā.ūñgā

allāh-re sādgī nahīñ itnī unheñ ḳhabar
mayyat pe aa ke pūchhte haiñ in ko kyā huā

koī hotā hai sañg-e-sīna ḳhusrav se raqīboñ kā
huā nāhaq halāk apne kā aapī kohkan baa.is

ham bhī hamesha qatl hue aur tum ne bhī dekhā duur se lekin
ye na samajhnā ham ko huā hai jaan kā nuqsāñ tum se ziyāda

dekh ke uljhan zulf-e-dotā kī kaise ulajh paḌte haiñ havā se
ham se sīkho ham ko hai yaaro fikr-e-nigārāñ tum se ziyāda

kyā batā.ūñ aaj vo mujh se judā kyūñkar huā
muddatoñ kā āshnā nā-āshnā kyūñkar huā

tere har naqsh-e-qadam par jis ne sajda kar diyā
terī nazroñ meñ bhalā vo bevafā kyūñkar huā

merī barbādī meñ jis kā haath thā vo fitna-gar
pūchhtā hai ab mujhe ye hādisa kyūñkar huā

jis ke hāthoñ ne jalāyā gulistāñ kā gulistāñ
is kā ghar bhī jal gayā to phir burā kyūñkar huā

aadmī to aadmī kā thā sharīk-e-ranj-o-ġham
munqata.a phir āj-kal ye silsilā kyūñkar huā

jis kī rahmat chand logoñ ke liye maḳhsūs ho
hogā kuchh logoñ kā vo sab kā ḳhudā kyūñkar huā

jab tirī nazreñ lagī haiñ kausar-o-tasnīm par
phir batā shaiḳh-e-haram tū pārsā kyūñkar huā

daar par laTkā diye jaate haiñ haq-go ai 'shafaq'
haq ko haq kahne kā tujh ko hauslā kyūñkar huā