lajā lajā ke sitāroñ se maañg bhartī hai
urūs-e-shām ye kis ke liye sañvartī hai
vo apnī shoḳhi-e-raftār-e-nāz meñ gum hai
use ḳhabar hī kahāñ kis pe kyā guzartī hai
javāb us ke savāloñ kā de koī kab tak
ye zindagī to musalsal savāl kartī hai
us aarzū ne hameñ bhī kiyā asiir apnā
vo aarzū jo sadā dil meñ ghuT ke martī hai
ab aa ga.e ho to Thahro ḳharāba-e-dil meñ
ye vo jagah hai jahāñ zindagī sañvartī hai
ye chhaTne vaale haiñ bādal jo kaale kaale haiñ
isī fazā meñ vo raushan dhanak nikhartī hai
koī paḌāv nahīñ is safar meñ ai 'maḳhmūr'
jo chal paḌe to havā phir kahāñ Thahartī hai