Tags-Gham

lagā rahe haiñ abhī ḳheme ġham kī vaadī meñ
ham is pahāḌ se dāman ko bharne aa.e haiñ

ik chādar-e-ġham badan pe le kar
dar dar phirā huuñ sardiyoñ meñ

shafaq naza.a meñ le rahī thī sambhālā
añdhere kā ġham khā rahā thā ujālā

na pūchh hāl-e-shab-e-ġham na pūchh ai 'purnam'
bahā.e jaate haiñ aañsū bahā.e jaate haiñ

ye chashm-e-nam ki hai dānā-e-ġham baḌī shai hai
chhupā huā hai isī ḳhaak meñ ḳhazīna bhī

mirī qaid-e-zīst ke saath hī hai ajal kī qaid lagī huī
huuñ sarīr meñ vo asīr-e-ġham jo qafas meñ bhī tah-e-dām hai

dil ne Thokar khā ke samjhā hadisā kyā chiiz hai
ġham kise kahte haiñ dard-e-lā-davā kyā chiiz hai

maiñ bhī ruk ruk ke na martā jo zabāñ ke badle
dashna ik tez sā hotā mire ġham-ḳhvār ke paas

huuñ ġham-nasīb to kyā ġham ki rāh-e-hastī meñ
talāsh-e-haq-o-sadāqat meñ ham-rahāñ to mile

na ab ehsās-e-ranj-o-ġham na ehsās-e-ḳhushī mujh ko
ye kis markaz pe le aa.ī mirī dīvāngī mujh ko

chhalak aa.e haiñ aañsū jab bhī aa.ī hai hañsī mujh ko
sunātī hī rahī paiġhām-e-ġham merī ḳhushī mujh ko

vafā kī pyaar kī ġham kī kahāniyāñ likh kar
sahar ke haath meñ dil kī kitāb detā huuñ

har ḳhushī dil se kyuuñ lagā baiTheñ
kis meñ ġham ho pata nahīñ hotā

ġham nahīñ monis na ho koī tire bīmār kā
vādī-e-ġhurbat meñ us ke saath himmat aa.egī

koī bhī jab hadaf-e-ḳhanjar-e-adā na milā
vo dasht-e-ġham se uThā le ga.e machal ke mujhe

ḳhāna-ḳharāb-e-ishq kī hālat na pūchhiye
koī bhī ġham-gusār ba-juz bekasī nahīñ

'rāsiḳh' kise sunā.eñ ham apnā bayān-e-ġham
'ġhālib' nahīñ 'anīs' nahīñ 'anvarī' nahīñ

ro.ab taarī thā zabāñ par tirā maḳhlūq thī chup
ham to āshiq the ġham-e-hijr sunā le ga.e ham

kuchh ġham bhī mayassar hameñ ab ke haiñ ziyāda
kuchh ye ki masīhā kī masīhā.ī bhī kam hai

koī hiire kī kanī se kam na thā hañgām-e-zabt
kuchh hameñ piinā paḌe aañsū bhī ġham khāne ke ba.ad