Tags-Gham

kaThin hālāt meñ apne irādoñ ko javāñ rakhnā
hameñ aatā hai dil meñ sho.ala-e-ġham ko nihāñ rakhnā

yaad kī ḳhushbū dil ke nagar meñ phailegī
ġham ke saa.e lagte haiñ ab shītal se

ġham atā kar ki shādmānī de
jo bhī de mujh ko jāvedānī de

sab se mahfūz maqām-e-ġham-e-tanhā.ī hai
fikr-e-duniyā ne akelā kabhī hone na diyā

sahte sahte jo na sahnā thā use bhī sah liyā
piite piite zer-e-ġham āḳhir gavārā ho gayā

uThā uThā ke tire naaz ai ġham-e-duniyā
ḳhud aap hī tirī aadat ḳharāb kī ham ne

phūloñ kī ġham-rasīda masarrat na pūchhiye
zāhir meñ ḳhanda-zan haiñ haqīqat na pūchhiye

dil ko na hogī tāb-e-ġham-e-be-tavajjohī
lillāh dāstān-e-mohabbat na pūchhiye

kyā Dubāyā muhīt meñ ġham ke
ham ne jaanā thā āshnā hai ishq

jahāñ meñ ho ġham-e-shādī baham hameñ kyā kaam
diyā hai ham ko ḳhudā ne vo dil kī shaad nahīñ

adam se maiñ na aatā is jahāñ meñ ġham uThāne ko
agar hastī mujhe terā patā hotā to kyā hotā

sauñp kar ḳhāna-e-dil ġham ko kidhar jaate ho
phir na pāoge agar us ne ye ghar chhoḌ diyā

kashākash-e-ġhame-duniyā se kis ko fursat hai
karūñ maiñ kis se yahāñ mashvare mohabbat ke

the kitne achchhe log ki jin ko apne ġham se fursat thī
sab pūchheñ the ahvāl jo koī dard kā maarā guzre thā

kahīñ husn kā taqāzā kahīñ vaqt ke ishāre
na bachā sakeñge dāman ġham-e-zindagī ke maare

shab-e-ġham kī tīrgī meñ mirī aah ke sharāre
kabhī ban ga.e haiñ aañsū kabhī ban ga.e haiñ taare

is duniyā ke rahne vaale apnā apnā ġham khāte haiñ
kaun parāyā rog ḳharīde kaun parāyā dukh apnā.e

is duniyā ke ġham-ḳhāne meñ ġham se itnī fursat kab hai
kaun sitāroñ kā muñh chūme kaun bahāroñ meñ lahrā.e

kar na sukūn-e-dil kā ġham hādi-e-mubtalā zarā
ishq kī bārgāh meñ dard kī kuchh kamī nahīñ

ab ġham-e-zīst se ghabrā ke kahāñ jā.eñge
umr guzrī hai isī aag meñ jalte jalte