Tags-Gham

dāman meñ liye phirtā huuñ maiñ daulat-e-ġham ko
ġhāfil hai nigahbān kahāñ raat guzārūñ

haa.il thī biich meñ jo razā.ī tamām shab
is ġham se ham ko niiñd na aa.ī tamām shab

hotā aayā hai ġham-e-zīst ibārat un se
garmī-e-bazm-e-ḳhayālāt chalī jaatī hai

guzishta shab mere paas baiThā tumhārā ġham mujh pe hañs rahā thā
vo kah rahā thā ki duur jā kar tumhārī paglī badal ga.ī hai

thaam kyūñkar sakūñ vafūr-e-sarishk
bahr-e-dil ġham satī ubaltā hai

saath laa.ī na.e ġham na.ī uljhaneñ
ab nahīñ chāhiye shādmānī na.ī

fasl-e-ġham dekh ke nam-dīda huā charḳh-e-falak
shāyad āñkheñ hī nahīñ ā.ina-bardār ke paas

ho ga.e kāfūr saare ġham ba-yak-laḳht-o-nazar
jab kabhī vo daad ummīd-e-tamannā de gayā

taz.īn-e-bazm-e-ġham ke liye koī shai to ho
raushan charāġh-e-dil na sahī jām-e-mai to ho

betābī meñ har tarah se barbād rahā
dil apnā ġham-e-dahr se ābād rahā

mire dil meñ zabt-e-ġham kā jo charāġh jal rahā hai
vo charāġh bujh gayā to mujhe log kyā kaheñge

shab-e-ġham se mirī ruktī ukhaḌtī saañs chaltī hai
mire sab maut ke pyāse mirī rātoñ se jalte haiñ

āfatoñ meñ ghir gayā huuñ ziist se be-zār huuñ
maiñ kisī rūmān-e-ġham kā markazī kirdār huuñ

muddatoñ khelī haiñ mujh se ġham kī bedard uñgliyāñ
maiñ rabāb-e-zindagī kā ik shikasta taar huuñ

dūsroñ kā dard 'aḳhtar' mere dil kā dard hai
mubtalā-e-ġham hai duniyā aur maiñ ġham-ḳhvār huuñ

sab ne jaanā ek apnā ham-vatan kam ho gayā
ġham agar niklā to dil kī hasrateñ ghabrā ga.iiñ

jo mauj-e-ġham-o-dard uThī hai mire dil meñ
hañgāma to be-shak hai qayāmat to nahīñ hai

ġham-e-jahāñ! bahut achchhā unheñ bhalā deñge
zah-e-nasīb agar dil pe iḳhtiyār huā

ik na ik mūnis kī furqat kā falak ne ġham diyā
dard-e-dil paidā huā dard-e-jigar jaatā rahā

us ke milne kī ḳhushī ho yā bichhaḌ jaane kā ġham
hosh rahtā hī nahīñ aisā nasha donoñ meñ hai