Tags-Gham

ġham kī ta.abīr se pahle mujhe mālūm na thā
mere ash.ār ko sañgīt banāne vaale

āsmān-e-dil pe bādal ġham kā yuuñ chhāyā rahā
haañ magar āñkhoñ se maiñ ne us ko barsāyā nahīñ

dasht-e-ġham se guzar rahā huuñ maiñ
tīrgī meñ nikhar rahā huuñ maiñ

rakhte haiñ dushmanī bhī jatāte haiñ pyaar bhī
haiñ kaise ġham-gusār mire ġham-gusār bhī

pyaar kā jashn na.ī tarah manānā hogā
ġham kisī dil meñ sahī ġham ko miTānā hogā

kahāñ rah jaa.e thak kar rah-navard-e-ġham ḳhudā jaane
hazāroñ manzileñ haiñ manzil-e-ārām aane tak

baḌh rahī haiñ qīmateñ har chiiz kī bāzār meñ
ek aisā ġham hai jo ab aur arzāñ ho gayā

dekh kar chāroñ taraf āsār-e-ġham āh-o-fuġhāñ
kyā karūñ 'maġhmūm dil merā hirāsāñ ho gayā

ġham-e-zamāna hai vo teġh-e-tishna-kām 'anjum'
uḌe haiñ paañv agar vaar bach gayā sar kā

tumhārī bazm meñ kyā shikva-e-ġham-e-hastī
yahāñ to saañs bhī ne.amat hai zindagī ke liye

jo un ke ġham se ho nisbat to har jahān meñ 'kaif'
masarratoñ kā ḳhazāna hai aadmī ke liye

jo saa.e duur charāġhoñ ke gird larzāñ haiñ
na jaane mahfil-e-ġham hai ki bazm-e-jām-o-subū

sunñe vaale ro diye sun kar marīz-e-ġham kā haal
dekhne vaale taras khā kar duā dene lage

kahīñ se maut ko laao ki ġham kī raat kaTe
mirā hī sog manāo ki ġham kī raat kaTe

kare na pīchhā mirā zindagī ko samjhā do
ye raah us ko bhulāo ki ġham kī raat kaTe

kaho bahāroñ se ab shāḳh-e-dil na hogī harī
ḳhizāñ ke giit sunāo ki ġham kī raat kaTe

na chāra-gar kī zarūrat na kuchh davā kī hai
duā ko haath uThāo ki ġham kī raat kaTe

ġham-e-mohabbat satā rahā hai ġham-e-zamāna masal rahā hai
magar mire din guzar rahe haiñ magar mirā vaqt Tal rahā hai

mirī hī ḳhvāhisheñ baa.is haiñ mere ġham kī 'munīr'
azaab mujh pe nahīñ harf-e-mudda.ā ke sivā

ajab sukūn thā shab āñsuoñ kī bārish meñ
vo ġham-gusār vo dard-āshnā hai tanhā.ī