Tags-Gham

uzr-e-gunāh dāvar-e-mahshar se kyuuñ karūñ
ġham miT gayā hai nāma-e-taqdīr dekh kar

fasl-e-gul kā ġham dil-e-nāshād par baaqī rahā
hashr lag ye muzlima sayyād par baaqī rahā

mire ghar meñ hai kyā rakkhā tirī ḳhidmat-guzārī ko
ki mere paas to mehmān-e-jāñ ġham ke nivāle haiñ

ham the ḳhushiyoñ ko bechne nikle
dard-o-ġham kī ḳharīd kar baiThe

zindagī le aa.ī ye kis moḌ par
ham sarāsar ġham kā paikar ho ga.e

shahr kā shahr luTerā hai nazar meñ rakhiye
ab matā-e-ġham-e-jānāñ bhī na ghar meñ rakhiye

yaar kī rahguzār ko bhī dekh
phir ġham-e-rozgār ko bhī dekh

kitne dukh ke din biite haiñ is kā bhī thā hosh kahāñ
apne haal ko kuchh samjhā huuñ sūrat se ġham-ḳhvāroñ kī

gayā hai ġham mire naame ko le ke kuchh aisā
ki aaj tak ḳhabar naama bar nahīñ aatī

ye hai shaam mausam-e-dard kī ye hai sub.h chehra-e-zard kī
hai bahār par ġham-e-zindagī koī dil-ḳhizāñ ho to le ke aa

zarā ḳhud se 'bāqar'-e-be-navā tū nikal ki tai ho mo.āmla
inheñ mil ye log haiñ ahl-e-dil ġham-e-rā.egāñ ho to le ke aa

jis meñ thā soz-e-ārzū us kā
shab-e-ġham vo havā chalī kab tak

ai shab-e-ġham mire muqaddar kī
tere dāman meñ ik sahar hotī

baḌā hai dard kā rishta ye dil ġharīb sahī
tumhāre naam pe ā.eñge ġham-gusār chale

ho ke said-e-ġham-e-jahāñ ye khulā
ġham se ik rāsta nikaltā hai

hujūm-e-ġham hai qalb ġham-zada hai
mirī mahfil mirā ḳhalvat-kada hai

sadā-e-ġham se laraztī hai zindagī 'mutrib'
lachaktī shāḳh se bhī phuul ab girā na kare

tanhā.ī kā ġham tum ko us vaqt maza degā
merī hī tarah tum bhī ho jaao agar tanhā

phuul khile to dil murjhā.e sham.a jale to jaan jale
ek tumhārā ġham apnā kar kitne ġham apnā.e haiñ

kaun haiñ ye jo bain kare haiñ un se kahiye ghar jaa.eñ
ek janāze meñ ik insāñ aur us ke ġham kaafī haiñ