Tags-Gham

ġham-e-paiham kī zindagī bhī milī
ġham meñ ik lazzat-e-ḳhafī bhī milī

ḳhushī mahsūs kartā huuñ na ġham mahsūs kartā huuñ
bahr-ālam tumhārā hī karam mahsūs kartā huuñ

bhūle-bisre hue ġham yaad bahut kartā hai
mere andar koī fariyād bahut kartā hai

ġham ke rishtoñ ko kabhī toḌ na denā 'vālī'
ġham ḳhayāl-e-dil-e-nā-shād bahut kartā hai

kabhī ye ġham thā ki samjhā nahīñ koī ham ko
aur ab ye Dar ki kisī ne samajh liyā hī na ho

mohabbat kī kaTīlī rahguzar meñ
ḳhushī kam aur ġham paayā bahut hai

marne pe bhī kaTā na azāb-e-ġham-e-firāq
kunj-e-lahad ḳhulāsa-e-shab-hā-e-tār thā

mat jalā ab 'sirāj' kuuñ zālim
shola-e-ġham kuuñ uzr-ḳhvāh kiyā

ġham-e-daurāñ ġham-e-jānāñ kā nishāñ hai ki jo thā
vasf-e-ḳhūbāñ ba-hadīs-e-digrāñ hai ki jo thā

ġham ke sāñche meñ ik ik nafas Dhal gayā un kī mahfil meñ ye daur bhī chal gayā
ashk piine se maanā ki dil jal gayā zabt-e-ġham kī magar aabrū rah ga.ī

naaz thā ham ko jin par unhīñ kī qasam vo bhī ulfat meñ nikle na sābit-qadam
be-kasī ke añdhere meñ ai shām-e-ġham ek ham rah ga.e ek tū rah ga.ī

qais saudā-e-ġham-e-gesū-e-lailā ke liye
le gayā chand ḳhayālāt-e-pareshāñ ham se

qaid-e-ġham se hai rihā.ī bahut āsāñ 'nātiq'
sharm is kī hai ki vābasta hai zindāñ ham se

kaun hotā hai kisī kā shab-e-tanhā.ī meñ
ġham-e-furqat hī ġham-e-ishq ko bahalā.egā

raag meñ aag dabī hai ġham-e-mahrūmī kī
raakh hokar bhī ye shola hameñ sulgā.egā

jahāñ kī nāyāft ke sabab meñ
jahāñ kā ġham khā rahe haiñ sāhib

ġham-e-jahāñ-nigarī kā safar-e-qayāmat thā
har ek zarre ke siine meñ kohsār mile

ġham-e-jān-e-bahār ke sadqe
ġham jahāñ ke isī se Talte haiñ

aziiz huuñ maiñ mujhe kis qadar ki har ik ġham
tirī nigāh bachā kar mirī talāsh meñ hai

hai kaun jo uThā sake bār-e-ġham-e-hayāt
ham ne bhī gar qabā-e-ḳhirad taar taar kī