Tags-Gham

ġham huā merī zindagī kā madār
is qadar ġham kā ehtirām kiyā

hasrat-o-armāñ bazm-e-tasavvur dāman-e-sahrā dast-e-junūñ
ḳhushiyoñ ke paiġhām haiñ 'ḳhālid' ġham ke hasīñ lamhāt ke naam

maiñ ne dekhī hai amīr-e-shahr kī vo muflisī
daulat-e-duniyā thī lekin ġham kā sarmāya na thā

soz-e-darūñ atā kiyā jurat-e-āshiqī bhī dī
un kī nigāh-e-nāz ne ġham hī nahīñ ḳhushī bhī dī

'faiz' takmīl-e-ġham bhī ho na sakī
ishq ko aazmā ke dekh liyā

fazā meñ guuñj rahī haiñ kahāniyāñ ġham kī
hamīñ ko hausla-e-sharh-e-dāstāñ na rahā

ġham-e-ma.āl ġham-e-zindagī ġham-e-daurāñ
hamāre ishq kā charchā kahāñ kahāñ na rahā

ġham-e-jahāñ ne kiyā is qadar ḳharāb ki maiñ
jo dostoñ meñ gizārī thī shaam bhuul gayā

phailā ġhubār-e-ġham to kahīñ muñh chhupā liyā
āñdhī uThī to ghar ke sutūñ se lipaT ga.e

dil ko kisī kī yaad kā ġham chāTtā rahā
yuuñ merī zindagī ke ka.ī saal ghaT ga.e

zindān-e-ġham kā dhyān bhī ḳhanjar se kam na thā
zanjīr kī khanak se mire paañv kaT ga.e

vo chup thā dīda-e-nam bolte the
ki us ke chehre se ġham bolte the

samundar se kisī lamhe bhī tuġhyānī nahīñ jaatī
magar sāhil ko ġham hai ḳhushk-dāmānī nahīñ jaatī

merī navā-e-ġham meñ hai shāmil fuġhān-e-gul
kaise kahūñ chaman meñ koī ham-zabāñ nahīñ

yuuñ mire ba.ad hai duniyā pe udāsī taarī
jaise duniyā mire hālāt kā ġham khātī hai

mausam-e-gul hameñ jab yaad aayā
jitnā ġham bhūle the sab yaad aayā

shab-e-ġham bhī ho jā.egī ik din āḳhir
kabhī ik ravish par zamānā nahīñ hai

zindagī ġham kā badal hai ārzūeñ yaas kā
āsmāñ sayyād ham qaidī haiñ aur duniyā qafas

har ek ruuh meñ ik ġham chhupā lage hai mujhe
ye zindagī to koī bad-duā lage hai mujhe

hikāyat-e-ġham-e-dil kuchh kashish to rakhtī hai
zamāna ġhaur se suntā huā lage hai mujhe