Tags-Gham

kaun hai jo na huā bandish-e-ġham se āzād
juz mire kaun rahā dahr meñ nākām-e-murād

mujh se mat chhīn ye jāgīr-e-ġham-o-ranj nadīm
hai faqat is se hī kaunain-e-dil-o-jān ābād

ab na maazī hī kā ġham hai na to fardā kī ḳhushī
ḳhāna-e-dil ko kiyā tum ne kuchh aisā barbād

ġham ġhalat karne ko aayā thā tire dar pe 'jamāl'
kyā ḳhabar thī ki nahīñ tū bhī ġhamoñ se āzād

tumhāre dil meñ jo ġham basā hai to maiñ kahāñ huuñ
ye maiñ nahīñ koī dūsrā hai to maiñ kahāñ huuñ

apne ġham kī fikr na kī is duniyā kī ġham-ḳhvārī meñ
barsoñ ham ne dast-e-junūñ se kaam liyā dānā.ī kā

taras khāte haiñ kyuuñ ahbāb mere haal par 'aḳhtar'
bahut be-chainiyāñ baḌhtī haiñ ġham-ḳhvārī ke mausam meñ

dil meñ mere har ghaḌī dariyā-e-ġham labrez hai
baat jo muñh se nikaltī hai vo dard-āmez hai

pahle in āñkhoñ se sail-e-ashk hotā thā ravāñ
ab vufūr-e-ġham se merī chashm-e-tar ḳhūñ-rez hai

din ga.e tafrīh ke jab se huā dil ġham-kada
kyā ġharaz ham ko agar duniyā tarab-añgez hai

ek dil hai ek hasrat ek ham haiñ ek tum
itne ġham kam haiñ jo koī aur ġham paidā kareñ

ye ġham kī bhiiḌ aur ye duniyā ke rāste
un kī ināyatoñ ke sivā aur kuchh nahīñ

bhaa.ī ko bhaa.ī kis liye detā hai ranj-o-ġham
bejā adāvatoñ ke sivā aur kuchh nahīñ

tanhā.ī ke aalam meñ aksar dil us se bahaltā hai 'shevan'
tārīki-e-shām-e-hijrāñ meñ ġham kī bhī zarūrat hotī hai

tark kī mujh se mulāqāt aap ne achchhā kiyā
ġham miTā har-vaqt kā jhagḌā gayā din-rāt kā

ek ġham meñ huuñ maiñ hī aalam meñ
yuuñ to shādāñ hai aur sab koī

allāh bachā.e ġham-e-furqat vo balā hai
munkir kī nigāhoñ pe bhī chhā jaa.e qayāmat

zabāñ-kushā.ī-e-ġham se khulī kitāb-e-ḳhayāl
varaq varaq pe khulā husn-e-mudda.ā tujh se

ik ḳhushī ham ne dil meñ chāhī thī
vo bhī ġham kī panāh meñ guzrī

jo maze aaj tire ġham ke azāboñ meñ mile
aisī lazzat kahāñ saaqī kī sharāboñ meñ mile