Tags-Gham

ik maiñ aur ik terā ġham
baaqī mātam be-ma.anī

dil meñ ḳhayālāt-e-rañgīñ guzarte haiñ jiyūñ boss phūloñ ke rañgoñ meñ rahiye
vahshat ke jañgal meñ kab lag pareshāñ ho ġham ke bhāroñ ke sañgoñ meñ rahiye

kab tak sunūñ bahār meñ ḳhushbū kī dastakeñ
kyoñ ai ġham-e-hayāt sañvar jā.ūñ kyā karūñ

ashk-e-ġham aise nahīñ haiñ jo umañD kar rah jaa.eñ
haiñ ye tūfān mire sar se guzarne vaale

apnā ġham mujh ko parā.e ġham se yaad aane lagā
ham-nashīñ mujh se dil-e-ranjūr kī bāteñ na kar

ġham-e-zindagī ik musalsal azaab
ġham-e-zindagī se mafar bhī nahīñ

maiñ nashe meñ tere hī chuur huuñ tire paas ho ke bhī duur huuñ
tū mire vajūd meñ hai nihāñ tirā ġham hī merī sharāb hai

taaq tāqat hai ġham-e-hijr kī bīmārī se
baiThte uThte haiñ aahoñ kī madad-gārī se

aur to tark kiyā sab ne shab-e-furqat meñ
bekasī baaz na aa.ī mirī ġham-ḳhvārī se

ḳhushī meñ yuuñ izāfa kar liyā hai
bahut sā ġham ikaTThā kar liyā hai

ġham kī manzil is qadar suunī nahīñ
do-ghaḌī hamrāh chal kar dekh to

ye zābta hai ki ġham ko na ġham kahā jaa.e
ye zābta hai sitam ko karam kahā jaa.e

vo jis ke ġham ne ġham-e-zindagī diyā hai 'zafar'
usī ke ġham meñ ġham-e-zindagī ko bhuul ga.e

tū kahāñ aa.ī mirā dard baTāne ke liye
ai shab-e-hijr nikal jā mire ġham-ḳhāne se

ab marī hālat-e-ġhamnāk pe khuḌhnā kaisā
kyā huā mujh ko agar aap nai nāshād kiyā

balā hai ye koī thoḌā na jaane paikāñ ko
lahu piyegā hamārā ġham-e-nihāñ kī tarah

ishq kyā hai ġham-e-hastī kā fanā ho jaanā
paikar-e-ḳhāk kā miT miT ke ḳhudā ho jaanā

mirī rūdād-e-ġham vo sun rahe haiñ
tabassum sā laboñ par aa rahā hai

dard-o-ġham rañj-o-alam āh-o-fuġhāñ
sarguzasht-e-ishq kī haiñ surḳhiyāñ

ek āñdhī ġham-e-jānāñ kī zarā Thahrī thī
ik bagūlā ġham-e-daurāñ kā uThā āvāra